Johnnyhabibe-Anchorman

Oranjestad-Pa hopi tempo caba mi a mustra riba iregularidadnan y corupcion cu ta wordo cometi na Dimas. E ultimo cu a yega na mi conocemento ta di un mucha cu a haya permiso NOBO hunto cu su Mama den cuadro di reunion di famia, siendo cu tanto Benny como esnan na Dimas a wordo poni na haltura cu e mucha tin un enfermedad hopi peculiar y cu e remedi so lo costa AZV mas o menos 250.000,= (250mil) florin pa aña. Te hasta un dokter a notifica Dimas riba e asunto aki. Obviamente no por culpa e mayornan di kier garantisa un bon cuido pa nan yiu, pero no por ta asina tampoco cu Aruba mester bay carga cu tur e gastonan envolvi. Y pueblo di Aruba cu sí a contribui na AZV pa añanan caba, mester entrega cierto parti di e pakete cu AZV ta ofrece.

Nos flamante minister nobo di labor ta declara cu desempleo a baha na Aruba. Un ponencia cu ami no ta comparti, pero por ta e minister ta usa esaki como excusa pa sigui duna permiso por mayor y detal. A bin na mi conocemento hopi caso di hendenan cu ta haya permiso di “dienstbode”, pero ta bai traha otro caminda. Mientras tanto e Arubiano mes ta sin trabou. Pero parce cu Hulanda tambe tin informacion cu cosnan no ta bayendo manera debe ser na Dimas. Den noticia a sali cu un delegacion hulandes, incluyendo e director general di husticia hulandes Gerard Roes, lo bin Aruba pa atende cu e situacion di inmigracion.

Ta un lastima di mira un Dimas cu tempo mi persona tawata encarga cune, tawata un departamento cu no a conoce corupcion, awe a decai den un departamento na unda corupcion ta na ordo di dia, cu conocemento y aprobacion di sr. Benny Sevinger. Ami nunca lo por ta felis y contento cu Hulanda ta bin mete den nos asuntonan interno, pero ta Mike Eman himself a logra den un tempo record deshasi di nos autonomia door di accepta y aproba corupcion den dia cla, di tal forma cu caminda a habri pa Hulanda bin investiga. Pero por algo sera cu Mike Eman a doblega pa e chantahe di Hulanda. Kiko lo tin pa sconde???

Pa nos recupera y mantene e autonomia, cu sr. Betico Croes d.f.m. a lucha p’e, ta importante pa nos regla nos propio asuntonan den un forma corecto y responsabel. Mi ta spera cu porfin lo para e bagamunderianan cu ta socediendo na Dimas riba instruccion di Benny. Mester pone tur esnan cu ta comete e actonan coruptivo aki responsabel, y percura pa un maneho di stranheria cu berdaderamente ta funciona na bienestar di nos pueblo y proteha nos mercado laboral.

Despues cu nos a perde nos autonomia financiero, awor ta mustra cu nos lo bai perde nos autonomia riba e tereno di Inmigracion tambe. Pues nos lo tin un Status Aparte cu hopi menos autonomia cu Corsow y St. Maarten. Y tur esaki pa motibo di un gobierno cu ta goberna nos pais yená cu corupcion. Esaki tambe nos lo bai acepta? Ta e momento oportuno pa Arubianisa nos Patria, manera UPP a campaña cu ne. Trece ordo back manera tabata e caso entre november 2005 y 31 di october 2009 na Dimas, na unda no tabata haci excepcion y na unda e trahador local tabata wordo proteha. Y MESTER trece back e modelo Suiso. Y aki mi ta spera cu tur partidonan politico, particularmente esunnan den oposicion haci un declaracion al respecto. Pa pueblo por huzga ken realmente ta para na su banda. UPP si ta kere cu mester bin un paro inmediato den otorgamento di permiso y un maneho cu ta defende e trahador local.

Ta di spera cu e delegacion di Hulanda lo haci un evaluacion y investigacion riba locual ta trata permisologia, no solamente pa e periodo november 2009 pa awor aki, pero pa henter e periodo desde di entrada di nos Status Aparte na 1986. Di mes e investigacion ey lo mustra cu for di comienzo di 2006 cu mi persona a wordo encarga cu Stranheria te fin di october 2009 na DIMAS NO tabatin lugar pa corupcion ni manipulacion; sí tabatin un maneho estricto pero na mesun momento humano. E investigacion mester cubri henter e periodo for di 1986, pa un comparacion por wordo haci entre e diferente manehonan riba e tereno aki.

Como indicacion cu na DIMAS lo tin cos cu no por mira luz di dia, ricibi adhunto un potret di documentonan cla pa bay kima pa asina ey trata di sconde cos.

Aparte di e tantisimo medidanan contra nos pueblo awor ta entregando nos autonomia. Ta basta. A yega tempo pa nos como pueblo para e masacramento aki. Ta e pueblo so por salba e pueblo.