Oranjestad-Ministerio di Cultura, Oficina di Monumento y Comision Paseo Monumental ta participa cu e Paseo Monumental IV 2014 lo tuma lugar riba diadomingo 14 di september 2014, di 9or di mainta pa 4or di atardi. Riba e dia aki un total di 11 edificio lo habri nan porta pa publico y lo por admira e edificionan di paden.
Na prome lugar Comision Paseo Monumental IV 2014 kier a gradici e doño y usuarionan pa duna permiso cu nan edificio lo ta habri y accesibel durante henter dia.
E edificionan lo ta data di 1867 te cu 1929. Nan arkitectura ta varia di cas di cunucu, mansion te cu cas di vivienda. Lo bay tin un total di 6 arkitecto cu lo duna guia y recorido na e diferente edificio monumental restaura. Nan lo pone enfasis riba con nan a restaura cada edificio y specialmente riba e tecnica di restauracion. E specialidad aki di restauracion ta e tecnica mas costoso y complica riba e tereno di arkitectura.
Miniterio di Cultura, Oficina di Monumento y Comision di Paseo Monumental IV 2014 ta informa na tur esnan cu ta desea di participa na e Paseo Monumental IV pa inscribi riba e diadomingo 14 di september for di 9’or di mainta caba y durante dia. Y un invitacion ta bay na e hobennan di 4 pa 17 aña pa participa na e speurtocht cu ta ser organisa specialmente pa nan y tin premio interesante. Ta bon pa trece dilanti cu cada arkitecto a haci un pregunta relaciona cu su edificio den e formulario di e speurtocht.
E paseo aki ta gratis y yega riba e Plaza riba Schelpstraat dilanti di Oficina di Monumento busca e material di informacion y mapa di e recorido di e paseo.
Johnnyhabibe-Anchorman 