Johnnyhabibe-Anchorman

Oranjestad-Dialuna mainta Minister Otmar Oduber hunto cu su colega Mike de Meza a informa pueblo di Aruba a traves di prensa, e gran noticia pa San Nicolas. Otro luna lo firma cu e compania hotelero Bahia Principe un Memorandum of Understanding (MOU) pa e construccion di un resort pariba di nos isla.

Minister Oduber a indica cu despues di 7 luna di negociacion y conversacionnan cu a tuma lugar cu e grupo di Bahia Principe cu a culmina siman pasa na Republica Dominicana, “awe nos por anuncia oficialmente cu dia 2 di october venidero, lo ta na Aruba e Presidente y propietario di Hotel bahia Principe, Sr. Pablo Piñero, caminda cu hunto cu Gobierno di Aruba lo firma un MOU pa por cuminsa desaroya Seroe Colorado na februari venidero (2015), pa na october di 2016 haci apertura di e liña principal di Bahia Principe, Don Pablo Collection”.

E lo ta un propiedad di 350 camber den e promer fase y na momento cu esaki ta cla lo tin e opcion pa e di dos fase sigui cu ta conta cu 200 camber adicional, yegando asina na un total di 550 camber.

Na luna di maart Sr. Adolfo Castellanos, representante di e grupo Piñero tabata na Aruba y a conversa cu e mandatarionan unda cu a expresa e intencion di desaroya un hotel na Aruba. A base di e conversacion ey, unda nan a cana na San Nicolas y a splica cu e area di desaroyo na e momentonan aki unda cu Gobierno lo por acepta pa tin un hotel all inclusive ta na San Nicolas. Esaki den cuadro di e desaroyo cu ta iniciando pariba di nos isla y cu un hotel por fit dentro di e desaroyo existente, pero cu miras riba futuro desaroyonan cu ta bay tin.

Durante e encuentro aki e interes a nace y e propio doño di e empresa, Sr. Pablo Piñero a bishita Aruba y a reuni cu Ministernan Oduber, de Meza y Sevinger, caminda a expresa interes hopi grandi pa por desaroya na Aruba mirando e calidad di e destinacion. Teniendo na cuenta esaki, a expresa e deseo di bin cu nan coleccion principal cu ta esun di Don pablo Collection cu ta di 5 strea dentro di all inclusive.                                               

Despues di esaki tabatin diferente conversacion y recientemente Ministernan Oduber y de meza a haci un bishita na Republica Dominicana pa conoce 5 di e propiedadnan cu nan tin na e pais en cuestion. Eynan nan a conversa riba con e propiedad aki por fit den e desaroyo Caribense cu kier mira na San Nicolas pa e cuadra den plan, maneho y vision cu Gabinete Mike Eman II tin pa pariba di nos isla. Despues di a reuni dos dia consecutivo, bishitando e diferente propiedadnan, reuniendo cu ingenieronan y ehecutivonan top cu a wordo manda for di Spaña y tambe conversacionnan telefonico cu Sr. Piñero  a yega na e conclusion cu tin suficiente base en comun pa dia 2 di october proximo firma un MOU pa e proyecto na San Nicolas.

Minister Oduber a duna di conoce cu e inversion di e promer fase lo ta entre 80 pa 100 miyon Dollar y e lo tin un duracion di 20 luna di tempo. Den e cuadro aki tambe a trata e aspecto laboral unda cu a acorda cu lo usa e forza laboral local semper y cuando cu tin e disponibilidad na nos isla.

Igualmente e mandatario a menciona cu un proyecto asina lo tin un impacto laboral positivo pa nos isla unda cu hopi hende di pariba ta paga 200-300 Florin pa luna pa transporte pa yega nan trabou na un di e resortnan pabou di nos isla. Esaki banda di e shopping mall cu nan lo establece cu ta consisti di entre 20 pa 25 tienda acompaña pa un plaza. E shopping mall aki lo keda habri pa entrepreneurnan local pa sirbi comunidad local como e bishitantenan. Adicionalmente Minister Oduber a informa cu nan lo bay traha cu operadornan di tour local, cu companianan di watersports local y transportacion local. Esaki lo crea oportunidad pa diferente companianan, manera entre otro car rentals por ubica nan mes pariba di nos isla y crea un desaroyo economico positivo.  “E spin off cu ta bay tin ta uno grandi pa pariba di nos isla. Pabien na tur esnan envolvi te na e momentonan aki. Eta un noticia sumamente positivo pa pariba di nos isla y Aruba en general ”.