Oranjestad-Durante e programa semanal di fraccion di MEP den Parlamento ‘Aruba merece mihor’ por a nota cu lider di MEP tabata bastante firme y na final a hasi un yamado na concuidadanonan cu awor ta e tempo pa cada cuidadano lanta y vocifera su desgusto contra e gobierno aki.
“Ta abo so por para e abuso aki, ta abo mester lanta para awor pa defende interes di bo yiunan y nan yiunan. Nos 7 den oposicion so, no por mas. A yega e momento cu abo tambe tin cu mustra cu bo ta stima nos pais, y cu bo kier bienestar pa bo yiunan y nan yiunan. Ta momento pa abo demostra cu bo amor pa bo patria, cu bo amor pa bo famia ta mucho mas grandi cu cualquier temor cu bo por tin di Mike Eman of su hendenan. Ta basta, pasobra Aruba merece mihor, pasobra abo merece mucho mihor”, lider di MEP a bisa.
“Den nomber di pueblo di Aruba nos partido MEP ta bai organisa un manifestacion masal, y abo tambe mester t’ey! Ta momento pa nos tur uni y bisa e gobierno aki pa nan baha awor, prome cu nan caba di sink nos pais. Cuminsa prepara di awor caba, papia cu bo bisinja, bo famia, papia cu bo yiunan cu bo nietonan y splica nan con importante e accion aki ta. Ta solamente si nos uni nos por demostra cu realmente e pais aki merece mihor”.
Lider di partido di MEP a laga sa cu nan ta trahando riba e preparacionnan, lo pidi e permiso y haya un fecha confirma, y mester hasi henter pueblo conciente di e importante di e manifestacion. E no ta referi aki na e manifestacion di Grupo di 7 planea pa otro siman, sino un otro manifestacion riba un fecha mas despues, pendiente aprobacion di e fecha. E programa ta ripiti diahuebs 9.10 p.m. na Canal 22.
Johnnyhabibe-Anchorman 