Oranjestad-Den e rapport di Algemene Rekenkamer Aruba (ARA) a keda publica cu Gabinete Eman a gasta 50 miyon sin autorisacion previo di Parlamento y sin splicacion alguno di e Minister di Finanzas riba e motibo di e gastonan extra aki.
Riba pagina 26 di e rapport di e investigacion di ARA riba e Cuenta Anual 2013 di Pais Aruba, ARA ta señala cu riba nivel total di gobierno, tin surpaso di gasto di 50 miyon. Esaki lo mester a keda splica pa e Minister di Finanzas den e cuenta anual, pero esaki no tabata e caso.
Mester remarca cu Ley di Comptabilidad ta prescirbi den articulo 14, cu si gobierno ta premira cu e lo surpasa e suma di gasto pa cu Parlamento a aproba, gobierno lo mester pidi permiso previo di Parlamento pa por hacie. Si e gastonan extra wordo haci toch, e ora e Minister ta personalmente responsabel pa paga pa e gastonan extra aki. Den e caso aki ta bisto cu tin Ministernan cu a gasta mas cu nan tabata apodera pa gasta door di Parlamento y segun Ley lo mester wordo poni personalmente resonsabel pa esaki.
Ta keda awor na e mayoria den Parlamento pa realisa cu Gabinete Eman a tuma nan haci grandemente y cu e tipo di falta di respet y trapamento riba nos Ley di Comptabilidad no ta aceptabel na nos Pais. Parlamento mester manda e señal corecto y usa e toolsnan na alcanse di Parlamento pa sanciona e Ministernan cu a actua contra e apoderacion duna door di Parlamento.
Johnnyhabibe-Anchorman 