Johnnyhabibe-Anchorman

Oranjestad-Ministerio di Cultura, Oficina di Monumento y Comision Paseo Monumental ta promove nos Herencia Cultural durante Paseo Monumental IV, 2014. Durante di e Paseo, Edificio Zoutmanstraat 1, situa riba Zoutmanstraat #1 den Oranjestad, tambe ta habri su portanan for di 10’or di mainta riba diadomingo 14 di september venidero.

Informacion di Zoutmanstraat 1

Un edificio di Gobierno yama ‘Landskantorengebouw’ cu a construi na 1910-1911. Bou di supervision di ‘Dienst Openbare Werken Aruba’, e tempo ey un division di ‘Departement van Openbare Werken’ di Curaçao, gobierno a laga traha esaki. Segun Hartog, ta e Gezaghebber Beaujon mes a tuma algun obrero den servicio. E edificio ta para completamente su so y ta separa Wilhelminastraat y Zoutmanstraat. E fachadanan ta simetrico y tin un ritmico horizontal y vertical severo cu detaye cu influencia neoclasico. Riba 10 di september 1910 a pone e prome piedra y den e diario di e Gezaghebber Suplente, Sr. Hendrik Johannes Beaujon, tin nota bou di tal fecha: “Heden is de eerste steen gelegd van de in de Oranjestad gebouwd wordende nieuwe kantoorlokalen […] (Awe a pone e prome piedra pa e edificio cu lo fungi como oficina publico na Oranjestad). In den voorgevel heb ik ingemetseld een verzegelde fles inhoudende een korte oorkonde luidende als volgt.” (Den e cement di e fachada principal mi a hinca un boter conteniendo e siguiente documento). Den e diario tawatin 5 liña reserva pa skirbi e texto di tal documento, pero nunca a yena esaki. Riba diasabra 25 di maart 1911 a habri e edificio. E oficinanan publico tawata e tempo ey na rand di Paardenbaai (ta te na aña 1939 a hala e costa artificialmente). Den e edificio tawatin ubica desde 1929, tempo cu Wagemaker mester a entrega su vivienda y oficina como Gezaghebber na Marina Real, e oficina nobo di gezaghebber. Ariba e prome piso tawatin oficina di gezaghebber, registro civil y censo (te cu 1934), como tambe Ontvanger. E piso abou tawata destina pa douane. Den transcurso di aña e edificio a duna refugio na diferente departamento; asina tawatin na riba e piso abou na 1920, Postkantoor, Telegrafie (un molina tawata genera e energia necesario pa e bateria) y Havenkantoor. Riba e prome piso tawatin e oficina di Ontvanger, e hefe di Postkantoor, e ambtenaar di Ministerio Publico, registro civil y censo. Aki tambe tawata efectua acto di matrimonio y tawata trata caso di Corte, pa cual tawatin un despacho y un sala di corte. Na aña 1936 Salubridad Publico tambe a ocupa e edificio aki. Mas reciente e edificio a ubica Museo Arqueologico, siguientemente Oficina di Monumento y despues Fundacion Fondo di Monumento, Fundacion Desaroyo Educativo Comunitario y Bureau Voorlichting (BUVO).

Durante aña e edificio a conoce diferente cambio y ahustacion. E cambio mas drastico ta e trapi pa subi na e prome piso. Awendia e trapi ta na banda drechi di e galeria, mientras cu pa un periodo largo esaki tawata na banda robes, esta refleho identico. E trapinan tawata na prome instante di palo. E espacio entre e pilarnan tawata habri y tawata forma parti di e galeria.

E arkitecto Sr. Jouel Croes di ‘Croes Architecture STudio N.V.’ hunto cu su team di su oficina lo duna e recoridonan na Zoutmanstraat 1, durante di e Paseo Monumental IV 2014. Den e edificio aki lo bay ubica e Tienda di Seyo di Artesania y Oficina di UNESCO pronto.

HIT 94

Ministerio di Cultura, Oficina di Monumento y Comision Paseo Monumental ta invita henter e pueblo di Aruba y amantenan di monumento pa haci uzo di e oportunidad aki pa participa na e paseo monumental di e aña aki y ban apoya, duna balor na nos cultura y nos herencia cultural y cera conoci cu e tecnica den arkitectura cu a ser uza den nos monumentonan.

Warda e articulo aki y sigur por uza esaki como fuente durante Paseo Monumental IV 2014.