Oranjestad-Despues cu e atleta masculino Stuart Smit a logra medaya di brons pa Aruba den e competencia Open di Mexico 2014 G1 teni na Aguascalientes. Diadomingo e atleta femenino, Monica Pimentel a sigui den e pasonan di Smit, unda e tambe a logra conkista un di tres lugar y un medaya di brons pa Aruba. E atleta Pimentel mescos cu Smit tin mas cu un luna den un campo di entrenamento na Mexico unda e ta entrenando bou guía di e ex entrenador di e seleccion di taekwondo di Aruba, Sr. Julio Ramos.
E taekwondista Monica Pimentel pa varios aña a residencia na Hulanda y a bringa den varios competencia internacional na Europa y tambe den e continente America, semper representando Aruba. Den e Open Internacional de Taekwondo di Mexico na Aguascalientes, unda mas di 200 competidores di 30 país di henter e continente America a topa otro, Pimentel a bringa den e categoria -53 kilos y a enfrenta e mihornan di henter e continente den su categoria. Bringando 6 pelea en total tanto den e Panamericano y e Open di Mexico, Pimentel a logra su prome medaya grandi pa Aruba.
Comision di Subsidio hunto cu financiamento di Fundacion Lotto pa Deporte ta kere fielmente den e desaroyo di nos hoben atletanan. Pesey mes ta apoya y sostene atletanan elite manera Monica Pimentel pa por competi den torneonan grandi caminda e mihornan di mundo ta topa otro. Lotto pa Deporte y Comision di Subsidio ta felicita e taekwondista Monica Pimentel cu su medaya di brons obteni den e Open di Mexico na Aquascalientes, Mexico.
Johnnyhabibe-Anchorman 