Oranjestad-E amariyonan di Dakota ta logra e prome trofeo di e temporada di futbol 2014 ora cu den e gran final di Copa Don Elias Mansur 2014 nan ta vence e naranhadanan di Sta Cruz cu e score di 4 – 0. Mester bisa cu e ekipo di Dakota a conoce varios caranan nobo pa loke ta e temporada aki y mester bisa cu e ekipo bou guia di e entrenador nobo David Abdul a duna su fruto den e prome torneo di e pre-temporada di futbol. Mester bisa cu for di siman pasa cu e weganan a inicia, e amariyonan di Dakota Island Best Windows & Doors, Cooper Tires, ATCO Concrete, Kendall, Manpower 4U y El Triunfo den nan prome encuentro a sa na gana for di Brazil Jrs cu e score convincente di 4 – 1.
Sinembargo pa su majan diasabra nan ta ser sorpendi pa e piratanan di Caravel den e tironan di penal despues cu e partido mes a caba den un empate na un gol. Diadomingo Dakota mester a enfrenta e fuerte ekipo di RCA den un wega di Do or Die, aki e muchanan di Dakota hungando un bon futbol ta bin gana for di RCA cu e score minimo di 1 – 0, cu un gol tempran den e partido. Cu e victoria aki Dakota ta termina na di prome lugar den grupo A cu 6 punto y cu un gol averahe positivo di +4.
Den e fin di siman tras di lomba, e Copa Don Elias Mansur 2014 a continua unda cu e ekipo campeon di Boneiro esta Real Rincon tabata di bishita y aki mester a enfrenta e ekipo di Dakota, porcierto Real Rincon tabata e campeonnan di e edicion di Copa Don Elias Mansur 2013. Mester bisa cu e muchanan di Dakota a demostra clase y corahe contra di e campeon boneriano, unda cu alo largo den un wega cu bon nivel di futbol, e ekipo di Dakota ta vence Real Rincon cu e score di 2 – 0. Diasabra Dakota mester a enfrenta e peligroso ekipo di Estrella kende ta sorprende e amariyonan ganando cu e score final di 2 – 1, pero mirando e reglamentonan stipula, e ekipo dirigi pa entrenador David Abdul ta pasa pa e gran final di Copa Don Elias Mansur 2014. Diadomingo den presencia di un publico bastante grandi, un bez mas Dakota ta topa Estrella unda cu e biaha aki si cosnan a bai diferente ora cu Dakota pa medio di golnan anota pa Ezra Bosnie cu dos gol, Dwayne Raven y Tyrone Rafael ta vence Estrella 4 – 0 y titula campeon di e Copa Don Elias Mansur 2014.
E muchanan di Dakota ta logra gana e prome trofeo di aña 2014 y tur cos ta mustra cu e amariyonan ta cla pa e temporada nobo cu ta bai cuminsa dentro di algun siman. E ekipo di Dakota a demostra un bon nivel di futbol durante di e pre-temporada aki y sigur lo sigui lucha pa mantene un bon resultado den e campeonato di futbol Division di Honor cu ta na caminda.
E organisacion di SV Dakota kier a gradici su patrosinadornan ISLAND’S BEST WINDOWS & DOORS, COOPER TIRES, ATCO CONCRETE, KENDALL, MANPOWER 4U y EL TRIUNFO pa e confiansa grandi deposita di nan ekipo e temporada aki. This is only the beginning of a great season!!
Johnnyhabibe-Anchorman 