Oranjestad-Den e conferencia semanal di fraccion di MEP parlamentario Glenbert Croes a reacciona riba e declaracion hasi door di parlamentario di AVP Mervin Ras relaciona cu cortamento den subsidio di nos grandinan. E parlamentario a declara lo siguiente: “Mi a tuma nota di un declaracion di parlamentario Wyatt-Ras unda cu e ta laga sa cu e no ta husto cu SABA lo cobra adicional na famianan di nos grandinan pa cuido. Nos ta di acuerdo cune, pero e mensahe ey e mester manda pa SU Gobierno cu ta cortando inhustamente den subsidio di diferente fundacionnan y awor tambe den cuido di nos grandinan.
Hecho ta cu no ta husto cu subsidionan ta wordo corta pa via di mal maneho financiero di
Gobierno. Lamentabel ta cu pa via di esaki diferente fundacionnan ta bayendo bancarota, of mester sera, y cu calidad di servicio na nos muchanan special y grandinan ta bayendo atras y hasta personal ta wordo manda cas consecuentemente cu cuido y atencion na e grupo vulnerabel aki ta bai atras.
E diferencia entre MEP y AVP ta cu nos partido ta di opinion cu cortamento den subsidio ta inhusto sabiendo cu tur e fundacionnan y instancianan cu ta yuda grupo vulnerabel den nos comunidad ta operando riba lo minimo caba. Cuida nos grandinan ta un debe moral! , segun parlamentario Glenbert Croes.
Johnnyhabibe-Anchorman 