Oranjestad-Diaranson ultimo lider di MEP Evelyn Wever-Croes a reuni cu Rector di Colegio Arubano sr. Tromp, tocante varios tema di importancia pa ensenjansa.
Un di e temanan ta trata e normanan pa studiante di MAVO por drenta Colegio Arubano, cu actualmente tin un impasse entre SMOA y Gobierno di Aruba. Minister a presenta su punto di bista den Parlamento siman pasa, sinembargo e partido di oposicion mes kier a scucha e otro banda di medaya.
“Nos di MEP kier mira e impasse aki wordo soluciona, y den esaki mester tene na cuenta e interes di e studiantenan. tanto e studiantenan di MAVO cu tin aspiracion pa drenta HAVO, pero sin sacrifica studiantenan cu ta na HAVO caba y tin aspiracion pa sigi un estudio avansa na Hulanda.
Awor caba tin vario sstudiante ta caba nan MAVO pero no ta haya e oportunidad pa sigi HAVO na Colegio Arubano na Playa. Na Colegio San Nicolas si tin e posibilidad ey, pero varios mayor tin problema cu e distancia. Tur esaki no mag di perhudica e studiantenan.
Nos mester tene cuenta cu Gobierno di Aruba a firma un protocol cu Hulanda cu pa 2016 e exigencianan di examen pa HAVO ta bira mas estricto, y na 2017 pa examennan di VWO. Si Colegio Arubano no cumpli cu e protocol aki, studiantenan por haya nan mes cu problema di reconosemento di nan diploma ora nan bai Hulanda. Esey ta algo cu nos mester evita cueste loque cueste.
Segun cartanan cu Minister mes a duna Parlamento, e Minister actual a nenga pa reuni cu directiva di SMOA di Colegio Arubano, y esey sigur no ta yuda pa yega na un solucion. Solamente den dialogo por yega na solucion.
Colegio Arubano ta wardando ainda pa haya aprobacion pa por cuminsa implementa cambionan pa por cumpli cu e Protocol. Mi ta spera cu e Minister duna oido na esaki mas pronto cu ta posibel pa evita cu studiantenan cu awor ta den HAVO 4 haya problema ora nan gradua aki dos anja. Di nos parti, den Parlamento, nos lo hasi tur lo posibel pa pone presion riba Gobierno pa atende cu e asunto aki, y pa yega na un solucion tambe pa loke ta trata studiantenan cu mester drenta HAVO despues di nan MAVO. Si ta nos mes mester reuni cu tur partido envolvi pa yega na un solucion, nos lo hasi esey, pasobra pa nos e studiante ta central”, lider di MEP Evelyn Wever-Croes a duna di conose.
Johnnyhabibe-Anchorman 