ORANJESTAD-Recientemente Presidente di Arubaanse Voetbal Bond, sr. ing. Richard Dijkhoff a reunie cu sr. Johan van Gein di KNVB y sr. Etienne Siliee MBA di Concacaf ariba diferente topiconan den cuadro di e “Samenwerkingsovereenkomst” cu AVB tin firma cu KNVB y tambe ariba e “Concacaf Technical Assessment program” pa Arubaanse Voetball Bond. Durante e reunionan aki tambe a trata entre otro e Technische Beleidsplan cu AVB ta bezig cune, Cursonan pa entrenadornan, Cursonan pa Refereenan, Marketing Strategic Plan y algun otro asuntonan mas di importancia pa mehoracion di futbol local.
Pa locual ta trata e technische beleidsplan, KNVB un biaha mas lo yuda poniendo un experto ariba e tereno aki na desposicion di AVB pa yuda traha ariba e plan aki y pa dentro di poco AVB por presenta e plan aki na su miembronan y su stakeholdernan. Door di haci esaki, AVB lo duna tur hende un bista den ki direccion AVB lo bai den e anjanan nos dilanti ariba e tereno Technico. Tambe AVB a palabra cu KNVB cu lo organisa den luna di October un curso cu lo hanja e nomber di Aruba TC-4 of Aruba D-license, specialmente pa e ex-hungadornan cu a froma parti di Seleccion di Aruba y cu actualmente ainda ta activo den e mundo di futbol, pero awor cada un como entrenador den e diferente divicionan na Aruba. Entro otro nos por pensa den direccion di un David Abdul, Jonathan Lake, Luis Croes, Elvin Poppen, Omar Tromp y mucho.
E curso aki lo bira un “opstap” cursus pa e famoso TC-III cursus di KNVB cu ta programa pa cuminsa na januari di aña 2015. Na e momentonan aki KNVB ta trahando ariba e exigencianan y rekisitonan cu e cursistanan mester tin pa por forma parti di e curso aki.
Pa loke ta trata e curso pa e Refereenan, ta intencion pa AVB conhuntamente cu KNVB bin cu un systema nobo pa locual ta trata curso pa refereenan na Aruba. Hunto cu KNVB, AVB lo hinca un curso den otro caminda cu bo lo hanja cu un referee pa e por fluit den divicion di honor, e mester slaag pa diferente categorianan di e curso. Por ehempel pa e por fluit den “youth divicion” e mester sigui un curso y pasa un examen cu exito di Scheidsrechter niveau 3. Pa e por fluit den divicion 1 y 2 e mester pasa examen di Scheidsrechter 2 y pa divicion di Honor e mester sigui y pasa un examen di e curso Scheidsrechter nivea 1.
Di e forma aki futbol di Aruba lo conoce refereenan cu lo ta mucho mas mihor prepara pa dirigi su weganan.
Asina aki tambe Aruba lo bira e prome Pais cu ta miembro di CONCACAF cu lo tin e systema aki pa referee. Tambe AVB tin palabracion haci pa haña e “Concacaf Technical Assessment program” esaki ta un programma nobo di Concacaf, cual programma Presidente di AVB a logra convence e Presidente di Concacaf, sr. Jeff Webb pa Aruba bini na remarke. Asina aki tambe Concacaf a apunta sr. Etienne Siliee di Korsow, cu ta Concacaf Education Instructor, pa su persona hunto cu AVB su Technisch Directeur haci un assessment pa asina por saca afor kico ta e nesecidadnan di AVB pa e siguiente 4 anjanan.
Despues cu AVB a firma un acuerdo cu LIFIDA cu pa campeonato 2015-2016 e divicion infantil lo resorta bou di AVB, esaki ta brinda un bon oportunidad pa dedica atencion na e divicion aki. Tambe a papia cu tanto KNVB y Concacaf ariba e posibel programmanan cu tin pa asina por duna atencion na e futbol femenino y aki tambe AVB a logra diferente palabrashonan. Entre otro sr. Etienne Siliee lo yuda Aruba cu un peticion na FIFA pa otro aña organisa un Projecto cu ta dirigi totalmente ariba e futbol femenino, cual programma yama “Live Your Goal”. E programma aki ta pa crea interes bou di e mucha mujernan pa nan tambe cuminsa practica e deporte di futbol y di e forma aki aumenta e cantidad di miembronan femenino cu ta practica futbol na Aruba.
Pues por bisa cu e reunionan aki tawata reunionan hopi fructivero pa e desaroyo di futbol na Aruba, especialmente pa e divicion infantil y divicion di damas.
Johnnyhabibe-Anchorman 