Oranjestad-Minister Otmar Oduber ta bou di cuestionamento serio pa loke ta trata e caso di Bushiri, pasobra el’a permiti su amigonan famia di ex lider di AVP Tico Croes haya e proyecto na 2012, pa NAN desaroya e proyecto, sin cu nan lo ta cumpli cu tur requisito.
Di acuerdo cu maneho di gobierno, un persona of grupo di hende cu haya un proyecto no ta wordo permiti pa bende e proyecto aki na otronan, pasobra no ta e intencion cu riba lomba di pueblo nan ta bai gana miyones. pasobra si ta pa bende e proyecto na otro hende, anto Gobierno mes por a hasi esey y genera mas entrada pa Gobierno mes.
Pero esey ta hustamente locual e documentonan cu a yega den nos brievenbus a demostra: e grupo di famia di Tico Croes, ex lider di AVP a bende e sharesnan den e proyecto ya dos anja pasa caba, siendo cu esey no ta permiti!
Ora cu Otmar Oduber a wordo cuestiona varios siman atras, y especialmente ultimo simannan pa parlamentario Dangui Oduber, e minister a scohe pa keda keto. Y awor porfin ela haya curashi, pero a bisa: nan no ta bendi, abo bin prueba otro. Otmar Odubher ta lubida cu Dangui Oduber a produsi prueba p’e cu documento den man, pues awor e bala ta den scochi di Otmar Oduber pa contesta riba esey. Cana rond ta reta otro hende no ta yudabo.
Pa colmo e UNICO defensa cu e por bin cun’e ta un articulo baho, nivel di redashi, “E gate di mas grandi cu pueblo conoce ta e crater den partido MEP”, anto den e articulo e ta referi na cosnan cu a pasa entre 10 pa 30 anja pasa, cu politiconan cu no ta ni den politica mas.
Mihor Otmar Oduber no habri e caha di pandora di pasado cu Caso Fondo Desaroyo San Nicolas, Interbank, etc., pasobra bo no por limpia bo imagen tirando lodo riba otro. Para manera un homber den bo sapato, y defende bo decisionnan, sino bo ta drenta historia, no solamente como “e tal Otmar”, sino tambe pa Strawberry-GATE, Arubus-GATE, Bushiri-GATE.
Johnnyhabibe-Anchorman 