Archive for September, 2014

roadOranjestad (buvo) Departamento di Obra Publico ta informa cu en conexion cu mudamento di scol Aspirant Opleiding Dienst Publieke Scholen na Savaneta cu e direccion di trafico riba trayecto entre parcela Savaneta 389B – Rooi Kochi 40 lo cambia bek pa un direccion pa un tempo indefini entrante 22 september 2014.

DOW ta pidi comprension y disculpa pa cualkier inconveniencia cu e cambio di ruta por ocasiona.

Oranjestad, 17 september 2014

crocodil jpg aOranjestad-Minister Mike Eman a kibra su silencio di ultimo tempo den un conferencia di prensa diaranson. Esnan cu a scucha e conferencia di prensa, tanto prensa, como simpatisante como oponente,  tabata tin un solo pregunta: Mike Eman a bira loco?
Cu un actitud como si fuera cu Aruba no tin ningun problema Mike Eman kier pa bo kere cu tur locual ta pasando, su welga di hamber, su yoramento dilanti prensa internacional, tur e abuso contra Gobernador Refunjol, ofende hulandesnan como abusador, retiro di Yrausquin, e kier pa hende kere cu tur cos ta bon. Cu no tin problema. Cu el’a planea tur esaki anticipando y trahando adelanta.
Mike Eman kiermeen cu tur e medidanan cu e ta bai suta pueblo cun’e no ta nada, nan ta “apenas” un porciento aki, mey porciento aya! Mike Eman a te hasta bisa cu e FINANCIAL TRANSACTION TAX ta “apenas” mey porciento, y cu e no lo causa dolor den comunidad.
Pero e FINANCIAL TRANSACTION TAX aki lo genera 250 miyon florin, 250 miyon florin cu Mike Eman lo ranca di e pueblo aki atrobe! E BBO na 3% a genera 180 miyn florin, kiermeen e FINANCIAL TRANSFER TAX ta pio ainda cu e BBO.
Ademas cu danki na e malgastamento di placa di MIke Eman mester bin cu health tax di 1%, e BBO mester bira 4,5% y e prijs di coriente mester subi cu 15%.
Ta con Mike Eman por para trankil dilanti camera y monta asina un show. Di berdad ta ponebo pensa cu su cabes no por ta bon!

simar

Oranjestad-Sindicato di Maestro di Aruba ta den pleno celebracion di su di 45 aniversario. E sindicato tin un trayectoria largo di diferente logro pa loke ta e derecho y e posicion huridico di e maestro. Entre otro den pasado e grandinan a para pa derecho y pago  igual di hende mohe den enseñansa. Tambe nan a lucha pa mihor pago pa e maestro en general. E luchanan aki a yega te na welganan grandi cu a termina na logronan importante di cualnan NOS, e maestro di awendia ta beneficia.

HISTORIA

SIMAR a nace for di cuna di VLA, esta Vereniging van de Leerkrachten van de Antillen. E tempo ey tabata tin varios organisacion cu tabata para pa e maestro. Despues di a tene un encuesta bou maestronan, a saca conclucion cu nan tabata desea un solo organisacion, cual a bin resulta den SIMAR, e unico sindicato di maestro na Aruba.

E SIMAR DI AWE

Te cu awe SIMAR, un di e sindicatonan di mas grandi na Aruba, ta mantene e trabou sindical riba pia. E directiva actual, consisitiendo di 5 hende moher, ta participa na Dialogo Social,  ta forma parti di comicion institui pa Dialogo Social cu ta traha riba tereno di enseñansa y ta tene relacion extrecho cu directivanan di scol , Minister di Enseñansa y Directie Onderwijs. Un di e puntonan cu tin atencion di directiva ta e Restructuracion Salarial, pa cual meta ta pa pone na vigor pronto.

Banda di esaki e directiva ta atende cu asuntonan huridico di miembronan y ta percura pa actividadnan social y di formacion pa miembronan y pa e maestro en general.

CAMPAñA

Manera ta custumber, durante temporada di celebracion, directiva ta tene un campaña pa recluta miembro nobo. Mas cu claro un maestro interesa por pasa inscribi na cualkier momento. Un miembro cu introduci un of mas miembro nobo, lo ricibi pa cada miembro introduce un ticket pa participa pa un weekend stay. Ganador di esaki lo ser anuncia na final di e caminata di dia 26 di september. Pa formulario por pasa na oficina di SIMAR of por pidi pa esaki via directiva@simar.aw 

CELEBRACION

Den cuadro di celebracion di e di 45 aniversario di SIMAR, directiva a organisa un serie di actividad social, recreativo y di formacion. Esakinan a cuminsa caba na mei cu seso-sport y lo sigui te cu december di e aña aki.

E siguiente tres actividadnan grandi ta e fiesta bailabel diabierna venidero cu ‘N Fuzion y Robert Jeand’or na cede di SIMAR. Pa preparacionnan organisatorio directiva ta haci un apelacion na miembronan pa pasa oficina mas pronto cu ta posibel pa nan ticket di entrada y eventual introducido. Esakinan lo ser registra riba nomber y ta solamente pa uso personal.

Tambe lo tin un caminata , un festival di canto, celebracion di Dia International di Derechonan di Mucha y un Christmas Bazaar.

Directiva ta haci un yamada na miembronan y na tur scol interesa den informacion di tur desaroyo di SIMAR su trabou y di actividadnan pa manda nan datonan actual na info@simar.aw pa asina nan por keda debidamente informa.


adv-hit94fm


 

Mauro Jones
Oranjestad-Dialuna atardi Mauro Jones di Jonespublicidad a entrega Alberto Klabér di Brazil Taekwondo Stichting e calender di aña 2015 cu awor si ta cla pa bay print.
Despues di tanto coreccionnan haci den e calender door di e directiva y Sharline Roga Klabér.
Tambe Alberto Klabér a delete e potretnan di e calender for di su computer y asina a atrasa tur cos y mester a saca algun potret di nobo. Dialuna atardi
Alberto Klabér a revisa tur e potretnan, layout y e diseño cu Mauro Jones a haci pa asina dune e luz berde y diamars esaki a bay rumbo pa print. Awor
cu tur esaki ta tras di lomba ta solamente pa warda awor pa dia cu nan keda cla. Brazil Taekwondo Stichting ta spera cu esaki lo ta prome cu Best of the
Best. E meta principal di e benta di e calender ta bay pa e team por biaha pa Europa na luna di juni 2015 pa un campeonato y camptraining pa 3 siman.
Esaki lo bay ta e promer biaha cu Brazil Taekwondo Stichting ta crusando oceano grandi hunto cu e team di Train Hard Fight Smart.

Advertise4


Oduber FirmaOranjestad-Diamars tabata un dia grandi pa transporte aereo y turismo di Aruba. Minister Otmar oduber a firma den nomber di Gobierno di Aruba un acuerdo bilateral cu Brasil riba tereno di transporte publico. E acto di firmamento a wordo realiza na oficina di Ministerio di Transporte na Brasilia, Brasil, entre Minister di Aviacion Civil di Brasil Wellington Morreira Franco y Minister di Turismo, Transporte, Sector Primario y Cultura di Aruba Otmar Oduber.

E acuerdo firma ta reemplaza un MoU tabatin entre e dos paisnan. E acuerdo ta uno asina yama “open skies” agreement unda no tin restriccion di capacidad ni frecuencia pa bula entre e dos paisnan. Esaki lo habri posibilidadnan pa mas aerolineanan di Brasil bula pa Aruba y tambe pa nos aerolineanan local por bula pa Brasil, aumentando asina trafico aereo entre e dos paisnan y aumentando e airlift for di Brasil na beneficio di nos turismo.

Manera ta conoci, e turista di Brasil ta uno hopi importante pa nos isla dor cu e tin un capacidad di compra halto y ta uno cu ta cumpra hopi riba nos isla. E acuerdo nobo aki lo bira un instrumento esencial pa fomenta crecemento di trafico aereo entre Aruba y Brasil, uniendo e pueblonan di Aruba y Brasil y fortaleciendo e lazonan entre e paisnan  mas ainda.

Ehecucion di e acuerdo bilateral nobo aki ta parti di e maneho di Minister Otmar Oduber pa amplia y moderniza e infrastructura di acuerdonan di transporte aereo cu Aruba ta conta cune, brindando asina aki oportunidad pa nos turismo y nos aerolineanan por crece mas ainda. Intencion ta cu e aña aki caba aerolineanan di Aruba lo cuminsa bula pa Brasil.

Minister Oduber kier a gradici na staff di Departamento di Aviacion Civil, Departamento di Relacionnan Exterior, tur esnan envolvi na su ministerio, Ministerio di Asuntonan Exterior di Reino y tambe Embahada di Reino Hulandes na Brasil pa e trabou preparatorio excelente haci pa por realiza e acuerdo bilateral importante aki.


spot 3


Mesa

Oranjestad-Diamars mainta Minister Mike de Meza, remplazando su colega di Turismo Otmar Oduber, a dirigi su mes na e publico presente durante e di 31 Conferencia Anual di Turismo pa Norte America (ATCA).

Minister de Meza a duna tur participante un bon bini oficial na nos isla y na e conferencia importante aki. El a disculpa su colega Oduber, kende ta na Brasil pa firma un acuerdo bilateral riba tereno di aviacion.

E manatario a duna di conoce cu Gabinete Mike Eman II ta continua cu su compromiso pa loke ta industria di turismo di Aruba como esun cu mas ta contribui na nos GDP. Tambe ta compronde cu turismo ta trata di hende y experiencianan, di desaroyo sostenibel, economia y e bienestar di nos hendenan.

Mescos cu nos a haci den pasado, nos lo sigui mehora e experiencia di nos bishitantenan y nos habitantenan y nos lo sigui desaroya nos producto, mirando cu esaki ta nos unico industria substancial, pa por ofrece un bon calidad di bida pa nos habitantenan, Minister de Meza a duna di conoce.

Continuando, el a bisa cu nos isla a mira resultadonan positivo den crecemento, no solamente den cantidad, pero mas importante ainda den ADR y RevPar, cu a crece cu 19.6% y 21.3% respectivamente durante e promer 8 lunanan di 2014. Mirando cu ta trata di un conferencia enfoca riba Norte America, e mandatario a indica cu den e mesun periodo aki por a mira un crecemento di 1.9% den e cantidad di bishitantenan for di e area aki y a gradici tur presente pa e logro aki.

Minister Mike de Meza a mustra tambe algun desaroyo cu ta tumando lugar na nos isla y cu San Nicolas tin atencion special den esaki, cual el a remarca ta su hogar.

El a bisa cu maneho di Gobierno, San Nicolas lo bira e capital cultural y historico di nos isla, unda cu inversionnan publico y priva lo tuma lugar pa por realiza e maneho aki.

Den cuadro aki el a menciona cu Gobierno lo ta firmando un MOU cu Bahia Principe Don Pablo Collection pa un hotel 5 strea di 550 camber cu lo contribui grandemente na e desaroyo economico di San Nicolas y vecindario. “Nos ta spera cu na 2016 boso lo por agrega e propiedad aki na boso inventario di camber pa bende na Aruba”.

Tambe Minister de Meza a indica cu tin diferente inversionnan tumando lugar den e area di seguridad. Un ehempel di esaki ta e implementacion di camaranan di seguridad, como tambe e pronto implementacion di e beach policy ci lo contribui na duna un mayor sentido di seguridad na nos bishitantenan.

Finalizando, el a bisa cu nos ta pasando den un bon momento den e industria turistico y ta spera cu e conferencia aki lo ta exitoso den fortalece e relacionnan den e industria turistico aki cu ta uno hopi dinamico y cu ta presenta regularmente retonan di tur sorto. “Danki pa boso colaboracion valioso y mi ta desea boso tur hopi exito cu e conferencia aki”.


Radio Productions


DEMOCRACIA, LAMENTA OF CELEBRA?

Posted: September 16, 2014 in Johnny Habibe

cornelius

Oranjestad-Na 2007 Asamblea General di Nacionan Uni a declara 15 september como Dia Internacional di Democracia.

Pa 2014 e lema lo ta “Engaging  young people on Democracy”.

M’a lanta awe mainta cu hopi alegria ora mi a ripara con intenso Aruba ta celebra e dia aki.

Pa duna contenido special na observacion di e Dia di Democracia, mi a comprende cu tur instancianan relaciona cu ehercicio di democracia den nos comunidada manera, Parlamento y Gobierno, tur sindicato, UA y IPA, tur scolnan secundario y tur asociacion na Aruba a planea  eventonan pa demonstra e berdadero espirito y practica di democracia.

Un gran cantidad di reunion y asamblea (oficial como informal)  ta tuma lugar unda ciudadania ta practica democracia activo den tur su formanan y riba tur nivel.

Tur corant tin edicion special y tur media radial tin programanan special dedica na e tema di e Dia e aña aki, cual ta ” involvi hobenan den democracia”.

Tur bario tin reunionan di dialogo y discusion igualitario, unda tur habitante  por y ta participa, tur  ta scucha otro, tur ta duna nan opinion bon pensa y articula, tur ta purba di comprende otro y tene cuenta cu otro.

Reunionan unda presidentenan ta guia y no dicta den reunionan y ta guia e proceso di consulta cu otro, negocia cu otro, purba di haña otro  y forma consenso cu otro.

M’a spierta!

Mi tabata soña! (atrobe)

Democracia , basicamente, ta ora un sociedad of comunidad tin un sistema di auto-gobernacion (goberna bo mes) basa riba e principio cu ciudania, individual of colectivo,  tin un influencia riba y un voz ora ta decidi asuntonan di gobernacion den e convivencia.

Masha simpel bisa: cada ciudadano tin e derecho y obligacion di participa  activamente den maneho general (gobernacion) di e sociedad.

Meta y principio fundamental di e sistema estatal aki ta pa percura pa biensestar y progreso di cada ciudadano y tur ciudadano, cu derecho y obligacion igual, sin exepcion y sin distincion.

Aki na Aruba nos a hereda, ( of a haña impone) un sistema estatal cu nan sa jama “democracia representativo den un monarchia constitucional” .

Esaki ta ancra den Statuut y Grondwet di Reino Neerlandes y Staatsregeling van Aruba conhunto cu leynan deriva.

E sistema aki ta basa riba y traha pa un sociedad , cultura y tiempo cu no ta existi mas na Hulanda mes, y sigur nunca tabata existi na Aruba.

Pa e mas cu 28 aña cu nos tin nos Status Aparte tin cu remarka dos punto cardinal.

E sistema y tur instancia invulcra a faya enormemente den e encargo fundamental di cuida bienestar y progreso di ciudania.

Nos convivencia a neglisha di desaroya y fortalese nos democracia den un sistema propio, activo y bibo pa henter ciudania.

E gran mayoria di nos ciudania ta kere cu democracia ke men cu bo por vota tur cuater aña y cu bo tin (supuesto) libertad di exprecion y cu tin prensa “liber”.

Ta claro cu ora paro keto djis un rato y pensa, cu democracia mester ta mas cu esey.

Malevolentenan y abusadornan a malusa e sistema combina cu cierto aspectonan di nos cultura y comunidad pa usurpa (tuma pa nan mes na forma ilicito) e podernan democratico di ciudania.

Awe nos tin (manera hopi otro pais) un democracia cu ta existi na nomber so, pero cu no ta haña ehecucion den practica.

Nos a laga elementonan aheno na democracia apodera di nos sistema y institutonan democratico y asina habri caminda pa un autocracia desaroya y (purba di) establese su mes.

Den mundo rondo di nos a bini (y tin ainda) basta dictadura cu ta basa nan poder riba un ”democracia manipula” den cual via tur tipo di maniobra (malversacion, intimidacion, corupcion, violencia, compra di voto etc) ta determina cu semper partido of Hefe na mando ta gana eleccionan na forma abrumador. ( te cu gana cu mas cu 100% di voto).

Den e casonan aki, tur instancia y institucion estatal, tur prensa y media radial y/ofotro organo priva di importancia a cai bao dominacion of infiltracion pa elementonan di partido na poder, pa asina sofocay elimina qualkier resistencia of oposicion na e poder dictatorial cu ta jama su mes democratico.

Nos ciudania neglisha nos fundacion y funcionamento democratico asina tanto cu e forsanan aheno a logra di degenera nos democracia na forma alarmante y spantoso.

Qualkier analisis critico y rigoroso di e situacion actual na Aruba lo tin cu conclui cu nos ta basta avansa riba e caminda peligroso aki.

Hopi di nos ta papia y munstra negativamente riba paisnan cercano di “democracia manufactura” manera Haiti, Venezuela, Guyana, tambe di otro pais na Afrika, Latin-America, Medio-Oriente y Asia, sin reconose kico ta pas den nos propio sociedad.

Nos mester tuma pasonan mesora pa cuminsa defende, expande y reinforsa nos espirito y practica di democracia!

Cada un di nos tin membrecia of afiliacion na por lo menos un organosacion, di Parlamento te club di domino!

Ban practica democracia activo eyden!

Ban hasi nos mes bira custumbra cu practica democracia!

Ban habri nos boca eyden, scucha otro su opinion, ban exigi esnan cu encargo y autoridad pa nan responsabilisa nan mes y duna cuenta.

Ban cuminsa biba democracia tur dia, henter dia.

Esaki ta menor cu “Happy Hour”tur dia , henter dia.

Nos tur tin cu siña democracia pa bira democratico.

Si nos cada un ta actua democraticamente, nos lo bira un sociadad, un pais democratico di berdad! Y no un pais autocratico.


adv-hit94fm


Bowling PabCon

Oranjestad-Un logro sigur historico ta loke e bolicheranan Kamilah Dammers y Thashaina Seraus a haci na Cali, Colombia ora cu den e competencia di PABCON Panamericano Femenino 2014 nan a logra termina na di dos lugar y triunfa asina cu un medaya di plata.

Diadomingo den e competencia di duo, Dammers y Seraus a pone man na obra y ta logra vence den forma unico e resto di elenco Panamericano cu excepcion di Merca y asina conkista medaya di plata pa Aruba. Guia pa coach Jim Porter, e atletanan a haci un tremendo papel unda na ta vence e otro duonan di entre otro Canada, Puerto Rico, Mexico, Republica Dominicana, Guatemala, Costa Rica y Colombia. Mester bisa cu Aruba a enfrenta e mihor hungadornan di bowling den e continente America y a bataya te final, dado momento Dammers y Seraus tabata ocupa un prome lugar cu 75 pin riba e duo Parkin y Kulick di Merca.

Den e ultimo añanan e deporte di bowling a demostra un mehoracion enorme den tur categoria y durante competencianan internacional nos atletanan ta briya logrando resultadonan impresionante. Mas cu claro cu esaki ta trece un satisfaccion cerca e federacion di ARBAS kende ta trahaduronabienestar di suatletanan.

 

Comision di Subsidio cu financiamento di Fundacion Lotto pa Deporte ta contento cu e resultado historico di e atletanan Dammers y Seraus obteni den e 2014 PABCON Panamericano Femenino na Cali, Colombia.Ta importante pa nos atletanan local competi den exterior esaki pa gana mas experiencia y midi nan propio nivel compara cu e demas competidornan den nos region.

Mirando e resultado di bowling por bisa cu Aruba indudablemente tin e nivel elite den Caribe. Un pabien na Kamilah Dammers y Thashaina Seraus como tambe na coach Jim Porter.


Radio Productions


Ibisa

Oranjestad-Haci cambio den bo custumber di come por ta dificil. Aki ta sigui 5 tips valioso cu lo por uza pa mehora bo sistema di come.

Controla bo porcion: E cantidad cu bo ta come ta mesun importante cu kico bo ta come. Purba mantene e cantidad di porcion cu bo ta come bou control. Un porcion por ehempel di aros herbi ta ½ cup (igual na 1 cucharon pa saca aros). Un porcion di carni, pisca of galiña ta 3 oz of 100 gram (grandura di bo planta di man).

Come mas fruta y berdura: Fruta y berdura ta un bon fuente di vitamina y mineral, ta abou den caloria y rico na fibra. Nan ta contene un substancia cu bo ta haya den mata cu por yuda preveni malesanan di curason y ader. Door di come mas fruta y berdura ta haci cu bo ta come menos alimento cu’n contenido halto di vet manera carni, keshi y snacks.

Scoge pa grano completo: Producto di grano completo (volkoren) ta un bon fuente di fibra y otro nutriente cu ta hunga un rol den regula presion di sanger y salud di e curason. Bo por aumenta e cantidad di grano completo door di cambio e productonan traha cu hariña blanco pa producto traha cu hariña di grano completo.

Limita vet menos saludabel: Limita e cantidad di vet satura y trans vet cu bo ta come ta un stap importante pa reduci colesterol den bo sanger. Colesterol halto den sanger por cera e adernan di curason y celebro. Esakinan por conduci na un ataca di curason of stroke.

Kita e vet visibel for di carni prome cu preparacion y/of scoge carni y producto di lechi cu menos vet. Prepara cuminda cu vet saludabel manera azeta di oleifi y canola. Simia, noot y linasa (‘flaxseed’)  ta contene vet saludabel y omega-3 cu por yuda baha e colesterol den sanger y proteha bo curason.

Reduci e cantidad di salo den bo cuminda: Comemento di un cantidad halto di salo por contribui na un presion halto cu ademas ta un factor di riesgo pa haya malesa di curason y ader. Reduci e cantidad di salo ora di cushina ta e prome stap. Mayoria di salo cu nos ta come ta bin for di cuminda procesa, di paki of bleki manera sopi y saus. Door di come cuminda fresco prepara na cas bo por reduci e cantidad di salo den bo alimentacion. Uza mas tanto condimento y specerij fresco pa duna e cuminda smaak.

 

Pa mas informacion tocante di un alimentacion saludabel por tuma contacto cu Departamento di Salud Publico 522-4200 of IBiSA na 5824987.


spot 3


 

Jog

Oranjestad-Aruba Triathlon Association a organisa dia 14 di september ultimo e Guardian Group OFF Road Duathlon na

Arashi.

25 atleta a competi cu otro den ciclismo y coremento. Tawatin 5 team di relevo.

E atletnan mester a core 5 km, core un distancia di 20 km riba bais y core 3 km bek

E evento a tuma lugar na Arashi. E ruta di coremento y ciclismo tawata canto di costa direccion di Faro. 

Ganador Overall Masculino

Den categoria Overall Masculino,  Renze Postma ta gana den un tempo di 1.07.59

Na di dos lugar a keda Mario Nooijen, cu 1.10.48 y na di tres lugar a keda Chester Hill 1.12.48

Kids y Female

Tawatin 4 participante den Kids.

Nan a core 2.5 km, core riba bais 10 km y despues core bek na pia 1.5 km den un tempo di 35:14

Kids te cu 11 Giannon Eights tempo 50.12

Kids 12-14 Prome lugar Xiqu Croes tempo 45.02, di dos lugar Anthony Wilson tempo 1.01.51 y na di tres lugar Thomas Hodge 1.23.49

Den categoria di dama tambe tawatin 1 participante, Sandra Postma

El a core 5 km, core riba bais 20 km y despues core bek na pia 3 km den un tempo di 1.39.10

Gradicimento

A.T.A. kier a gradici su sponsornan:

Guardian Group, Lotto  y Subsidie Commisie cu a haci e evento aki posibel.

Un danki di curason ta bay pa tur nos boluntarionan y tur persona cu a bin apoya e atletanan e mainta trempan ey.

Ta topa bek pa e GUARDIAN GROUP KIDS AQUATHLON, diasabra, 27 di september pa 7 or di mainta na Boca Cathalina.


adv-hit94fm