Gerick Croes (MEP): Mientras aña 2014 a revela un desaster financiero, Gabinete Eman II mes ta indica cu 2015 ta un aña pa hala faha mara

Posted: January 2, 2015 in Johnny Habibe

Garick Croes

Oranjestad-Tin biaha e decisionnan cu nos tuma awe lo por resulta di tin consecuencianan severo cu nos mester bay deal cu nan den futuro. Esaki ta netamente e caso di Gabinete Eman cual a base di decisionnan iresponsabel a crea un dilema financiero cu consecuencianan pisa y valido pa termino largo. Aña 2014 a percura pa revela e estado di un finansas deteriora na pueblo. E no ta un secreto cu awor ta pueblo ta esun cu tin cu bay paga pa e fayo flagrante cometi y esaki ta cu e famoso medidanan cual varios a wordo menciona caba. Literalmente Gabinete Eman a endueda nos pais sin tin placa y garantia cu cosnan lo bira mihor.

Medida tras di medida

For di un comunicado di Minister di Finansas nos a tuma nota di su declaracion indicando cu 2015 lo ta e aña di reto. Logicamente e no ta referi na un reto pa Gabinete Eman so pero pa e pueblo tambe. De facto e ta spiertando pueblo di Aruba pa hala faha mara den 2015 y prepara pa un serie di medida cu lo ta necesario pa scapa “pellejo” di Gabinete Eman. No mucho tempo atras for di un promer instante a expresa cu Gabinete Eman II lo no ta na merced di recomendacionnan di CFT. E realidad ta cu nos pais NO tin placa cual ta pone cu mester bay presta y crea fondo pa via di e propio desaster cu nan mes a crea. Promer Minister tawata papia di “eerst groeien dan snoeien” pero a opta pa cuminsa corta den gruponan mas vulnerabel den nos comunidad y implementa medida tras di medida riba pueblo sin cu di berdad nos pais a conoce un crecemento. Esaki ta e di varios biaha cu e ta contradeci su mes y ta kere cu pueblo lo no ripara. 

Poder di compra

Den luna di december Camara di Comercio a expresa cu e decisionnan cu lo bay wordo tuma entre otro implementacion di cierto medidanan door di Gabinete Eman lo bay trece consecuencianan inflatorio pa e ciudadano. Esaki kiermen cu costo di bida lo bay sigui subi. Realidad ta cu e poder di compra ta deteriora pa hopi tempo caba y gobierno di AVP nunca a percura pa laga pueblo mantene esaki of mehor’e. Mas aleu e instancia a enfatisa cu nos nivel di divisas ta abou y cu generacion di divisas lo mester bira un prioridad pa nos maneho economico. Mientras Gabinete Eman no tin un plan real con pa diversifica nos economia y stimula crecemento nos pais lo sigui confronta dificultad. E pronosticonan di crecemento ahusta na 1.6% no ta ni cumpli cu loke mester ta un minimo di 3% pa por logra sali di e dilema financiero. Pa colmo e cifranan preliminario di 2015 ta mustra cu lo bay sigui gasta y ranca placa for di pueblo sin piedad! Ta di lamenta pasobra tur hende lo a spera cu Gabinete Eman lo a bay cuminsa “lead by example” door di reduci entre otro ministerionan, coordinadornan y gastonan innecesario di promocion. Esaki ta ehempel bibo cu Gabinete Eman semper a scoge “hancho pa nan y smal pa pueblo”.

Compromiso ta sigui

E compromiso como hoben politico ta pa continua na informa pueblo y sigur cuestiona Gabinete Eman den cada aspecto cu e ta fayando specialmente pa e parti financiero! Condenabel ta cu e berdad financiero ta algo cu AVP semper a purba na tapa, ignora of tin biaha ta haci como sifuera nada un pasa! Ta di lamenta cu tanto e parlamentarionan di fraccion di AVP como e gobernantenan nunca a papia di e desaster crea den apenas 5 aña y tampoco no a cuestiona e maneho financiero deficiente. Un cos ta sigur cu loke nan no bisa of purba na tapa bo por conta cu nos como politico opositor si lo trece esakinan na luz di dia. 

Algun proposicion di MEP

Como politico nos no a solamente cuestiona pero tambe a contribui cu proposicionnan viabel cu a wordo tuma bou consideracion, entre otro alternativanan pa un proceso eficiente di paga studielening (DUO). Loke sigur nos a enfoca riba dje ta e poder di compra y netamente e mocion pa ahusta e “belastingvrij bedrag” di 20 pa 30 mil ta algo cu MEP a dedica atencion na dje y cual fraccion di MEP lo bay pone presion pa esaki wordo implementa ya cu el a haya aprobacion unanime. Sin laga afor e hecho cu nos di MEP semper a pone enfasis riba ampliacion di canasta basico cual ta un compromiso solido y nos ta convenci cu esaki lo trece alivio pa nos ciudadanonan.  Un conseho cu lo mi kier duna cada ciudadano pa 2015 ta pa no haci e mesun eror cu Gabinete Eman di bay riba un “spending frenzy”, gasta loke bo no tin paso sigur e lo crea problema pa bo mes. Ta consehabel pa traha un presupuesto chikito pabo mes y categoriza/prioritiza bo gastonan segun nivel di importancia. Apesar cu 2015 ta un aña di hala faha mara e ta importante pa nos ta consciente di con nos ta gasta nos placa e aña aki.  Pa termina mi kier a gradici cada un lector pa e feedbacknan ricibi durante aña 2014 y kier desea pueblo di Aruba hopi dicha, salud, amor, suerte, harmonia familiar y prosperidad den 2015. 

adv-hit94fm

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s