Palm Beach — Rex Broekman, editor di Huaraz Telegraph a presentador di noticia na El Informativo, di Peru, actualmente ta di bishita na Aruba y el a keda asina impresiona cu e infrastructura excelente di turismo y atraccionnan excitante cu el a dicidi di filma un cantidad di segmento di television pa su canal local di noticia, Cable Andino Channel 3, na su ciudad natal di Huaraz, cual, mescos cu Aruba, tin un populacion di 120.000. El a cubri e historia di e isla, Deporte, Gastronomia, Cultura y bida Peruano na Aruba.
El a recluta e ayudo di su ruman homber, e instructor di fitness Roy Broekman, kende na su turno a recluta e director local y editor di pelicula Aaron Croes di Xtreme Productions Aruba. Hunto nan a bin cu un gran cantidad di hende interesante y bunita luga pa contribui na e filmacion, cual lo wordo hinca den otro pa e ekipo di Cable Andino na Huaraz, cu cinco diferente introduccion for di sitionan iconico na Aruba. Un danki special ta bai na Peruanonan cu ta biba riba e isla, Edwin, Adolfo, Roxanne, miembro di Parlamento Marisol Lopez Tromp y e doñonan di El Chalan Restaurant, pa nan cooperacion cu e proyecto.
E Huaraz Telegraph, unda e materialnan tambe lo wordo publica, ta un corant mensual di habla Ingles, sirbiendo e turistanan y populacion local di Huaraz. Bo por bishita www.thehuaraztelegraph.com pa mas informacion. Huaraz ta e ciudad capital di e Estado di Ancash, situa den e parti central di e Callejon de Huaylas Valley, na un elevacion di 3,050m. E ciudad ta biba di e turismo di e Andes Peruano, specialmente pa deportenan di winter y aventura, ya cu masha hopi bishitante for di rond mundo ta practica rock climbing, hiking y snowboarding.
“Nos bishitantenan, mirando e grabacion na Aruba, kizas lo kier hunga beach tennis, windsurf y kite surf,” segun splicacion di Rex, kende ta disfrutando di e tempo y hospitalidad di Aruba mientras cu e ta trahando riba su documentario.
Aki por mira e ekipo na El Chalan, hunto cu Marisol Lopez Tromp, y na e stacion di television na Peru cu Dennis Caballero.
Johnnyhabibe-Anchorman 