Departamento di Agricultura, Cria y Pesca ta reconoce e importancia di e insectonan aki
Oranjestad – Manera ya ta conocir e abeha ta hunga un papel importante den e sobrevivencia di e flora y fauna rond di mundo como tambe pa cu e reproduccion di un cantidad grandi di frutanan y berduranan cu ta wordo consumi diariamente manera ta tomati, maishi, awakati y apel.
Mirando con importante e insectonan aki ta Departamento di Agricultura, Cria y Pesca tin como tarea e proteccion di e insectonan aki riba nos isla pa cual motibo a crea e seccion di Apicultura di Santa Rosa unda cu ta rescata y realoca abehanan cu ta den peliger y cu ta forma un molester pa cuidadanonan. Den e seccion aki e specialista di aheha di Santa Rosa ta cuida y produci honing local cual ta wordo bendi y como tambe usa pa cu produccion di binja local traha di honing. Tambe e seccion di Apicultura ta wordo usa grandemente como centro di informacion na alumnonan di scol unda cu un casita special a wordo traha pa asina studiantenan por observa e comportacion y tarea di abeha den un area protehi.
Pa por cumpli cu e tarea aki Santa Rosa ta ofrece servicio unda cu ta recohe abehanan cu ta forma un molester pa habitantenan cual servicio ta completamente gratis. Aki specialistanan di Santa Rosa ta usa tactica y conocimento pa recohe y realoca e insectonan aki den un forma structura cu no ta causa danjo ni trauma na e abehanan.
Departamento di Agricultura, Cria y Pesca ta segura cu e servicio di recohemento di abeha ta completamente gratis unda cu e Apicultornan di Santa Rosa por wordo reconoci na e logo di Santa Rosa riba nan uniform.
Durante e ultimo simanan Santa Rosa a ricibi differente yamada indicando cu personanan no authoriza ta haci uso di e nomber di Santa Rosa pa recohe abeha y cobra pa cu e trabou aki pa cual motibo kier pidi pueblo pa tuma contacto cu e Departamento na 5858102 si acaso algun persona haci uso di e nomber di Santa Rosa pa collecta abeha y cobra pa cu e trabou aki.
“BAN SOSTENE NOS CULTURA , PRACTICA CRIA, PESCA Y AGRICULTURA”
Johnnyhabibe-Anchorman 