ORANJESTAD – Despues cu e siman aki líder di MEP Evelyn Wever-Croes a wordo apunta pa representa Aruba den e comisión di Reino di Integridad, dirigencia di partido AVP a manda instruccion pa saca líder di MEP di e posicion ey. E miedo ta grandi cu Lider di MEP den e Comision ey por desenmascara tur e escandalonan di partido AVP. Ademas, partido AVP no kier tende di e leynan cu mester wordo introdusi pa controla financiamento di partidonan político, ni di screening di minister. Hustamente e leynan aki Evelyn Wever-Croes a anuncia cu e lo traha duro riba nan pa nan bin, pero no ta combini AVP, ni esnan cu ta financia AVP, pa e leynan aki bin.
Pesey AVP mester a hasi tur lo posible pa stroba e candidatura di Evelyn Wever-Croes den e comisión ey.
Y riba e ultimo dia di IPKO nan a logre. Baba Herde sin consulta, a dicidi di saca Evelyn Wever-Croes y pone Marlon Sneek, algo cu a cai manera un bom den e reunion, especialmente cerca e delegacion di Hulanda. E delegadonan di Hulanda aparentemente tabata bon na altura di e escandalonan rondo di Marlon Sneek cu accidentenan stranjo y dudoso den trafico y su incontinencia debil. Es mas, durante un combersacion entre delegadonan di Hulanda y Corsou, e ehempel ey a wordo duna como falta di integridad. Cu e decision aki Baba Herde a pone cara di henter delegacion di Aruba na berguensa. Si bo no tabata kier un hende di MEP, bo tabata tin cantidad di otro opcion, den seno di AVP mes, di persona cu no tin duda den nan integridad. Pero e escohencia pa Marlon Sneek a cai den masha mal tera. Awor ta di lubida cu Aruba ta haya leynan di integridad por lo pronto!
Johnnyhabibe-Anchorman 