Oranjestad (buvo) Departamento di Obra Publico ta informa pueblo di Aruba en general y specialmente nos automobilistanan cu diaranson 14 di januari proximo lo cuminsa cu reconstruccion di Hendrikstraat te cu crusada cu John G Emanstraat. E caya aki ta identifica como fase 1A segun e plan di proyecto pa rehabilita diferente cayanan den centro di e nucleo comercial di Oranjestad.
Hendrikstraat lo ta cera pa e motibo menciona pa reconstruccion entre 7:30 am te 4:00 pm. Duracion di e trabou di reconstruccion lo ta 4 siman. Rutanan alternativo lo ta indica cu baricadanan y borchinan di aviso. Ta pidi tur automobilista y negoshinan y otro usuarionan pa tene cuenta cu e inconveniencia cu lo por surgi pa cual nos ta pidi nos disculpa.
E proyecto di rehabilitacion di e cayanan menciona lo continua despues di Hendrikstraat den e siguiente secuencia. Fase 1B. Esaki ta e pida di Middenweg entre Hendrikstraat y Waterweg. Lo continua despues cu fase 1C cu ta Waterweg e parti entre John G. Emanstraat y Caya Principal y lo termina cu fase 1D cu lo ta e parti di Middenweg entre Dwarsstraat te Waterweg. Cada fase lo tin un periodo di reconstruccion promedio di entre 3-4 siman. Duracion di reconstruccion di e totalidad di fasenan lo ta di 16 siman.
DOW lo informa publico debidamente di cambio di circulacion di trafico segun e proyecto di rehabilitacion aki ta desaroya.
Johnnyhabibe-Anchorman 