Willemstad – Gerensia i koleganan di Iris Maduro a bini huntu djaweps último
pa yama ayó na e empleado ehemplar aki.
Iris Maduro kende a baha ku penshun despues di 43 aña di servisio, a traha
den e diferente empresanan di Mensing (Strada, Samen i Caminada).
Durante tur su añanan di servisio el a sobresalí komo un empleado sumamente
dediká na su trabou i e tabata un bon ehèmpel pa su koleganan.
Ta serka dje kasi tur hende nobo a siña kon hasi e trabou.
Gerente general di Mensing’s Caminada, Helvig Van de Laarschot-Jonckheer a
bisa ku ta Iris a bira kara di Caminada.
‘E loke ta mas remarkabel di Iris ta su memoria fotográfiko pasobra e ta
kòrda tur kos ku tin di aber ku e míles di artíkulonan den su departamentu.
Ta bin aserka ku resientemente na momentu ku mester a hasi un pedido grandi
ami mes a bin haña sa ku ta tres hende huntu mester a hasi e pedido ku Iris
so por a atendé den pasado’, asina sra. Van de Laarschot-Jonckheer a bisa .
Finalmente e gerente a pidi Dios Todopoderoso hopi aña mas di bida i salú pa
Iris Maduro por disfrutá di e penshun ku e meresé!
Riba e potrèt por mira momentu di despedida despues di 43 aña di Iris Maduro
na Mensing’s Caminada.
Johnnyhabibe-Anchorman 