Johnnyhabibe-Anchorman

Ami kier puntra cada un ciudadano cu ta lesa e articulo aki, puntra nan mes si na Aruba saca potret di polis den publico ta contra ley?

Mi kier comparti cu pueblo un experiencia directo cu mi famia a caba di pasa aden weekend cu a pasa. Depues di a enjoy fakkel optocht hunto cu su yiunan, mi bieu, pensionado di 62 anja, despues di a saca potret pa recorda e bon memorianan tabata na caminda pa su auto pa bay cas. Diripiente den Vondellaan e ta pasa band’i un grupo di polis y ta saca un potret di nan sin sa precies kiko ta pasando y sin pensa mas leu. Diripiente un polis ta tira man ariba e camara y ta cuminsa gara mi tata na unda cu mi tata a resisti cu su derecho paso e no hasi nada contra ley. Asina e otro polisnan presente a bula ariba dje pa boei e, y a bay asina leu di tackle e pa asina e cay cu cara ariba vloer y ariba dje pone rudiya ariba su cabez manera cu ta un criminal e ta.

Awor mi kier puntra di unda a sali cu polis por usa forza execisivo sin cu tin un motibo y violacion di ley?  Ki mishi cu den un pais, supuestamente democratico, un ciudadano no por saca potret di polis den publico?

Na mesun momento tabata tin presencia di 24ora.com cu si ta saca potret na nan agrado cu conosimiento di polis y ta publica esaki ariba su website prome cu tin un process verbal, investigacion of un clarificacion pakiko mi tata tabata wordo maltrata na e momento ey. Nos medionan di comunicacion tey pa zorg cu noticia ta bon investiga y confirma cu fuentenan verifica prome cu e wordo publica y asina distingui noticia for di farandula y redo. Jammergenoeg 24ora.com no a cumpli cu requisitonan basico di professionalismo y no por wordo considera como fuente serio di comunicacion. Pero ya e danio a wordo haci, ya nos famia ta haya yamada di famia y conosi puntrando kiko a pasa. Unda cu redonan ta cuminsa core sin sa e berdad. Y ken ta para responsible pa e danjo aki haci na mi famia? 

Pa splica con mas leu polis a bay y con polis a haci fout tras di fout den proceduranan estableci pa ley y unda cu bo ta realisa cu nos polisnan nin sa nan mesun trabao. E agentenan na e scenario a gara mi tata y tire den van di polis pa hiba warda. Benta den e van y geboei e la realisa cu no por a hala rosea. Imagina bo, mi tata ta diabetico, benta den e van di polis den un posicion cu e no por a hala rosea y no por move. E por a fayece eynan sin cu hende por a realisa na tempo, y ken lo para responsible e ora?

Bo sa ki gevoel esey ta crea den bo, ora cu bo ta experiencia un abuso di poder y unda nos tur cu ta sigui noticia internacional ta wak con hendenan innocentemente ta muri of wordo mata na man di polis den exterior dor cu nan no ta cumpli cu regla?

Dios gracia mi tata a cuminsa scop e porta di van pa hala atencion di polis para band’i van pa habri e porta y zorg cu nan pone sinta bon y los su handboei un tiki. Y corda bon, tur esaki ta pasando sin cu mi tata sa pakiko e ta wordo aresta y maltrata asina!

Yega warda di polis e ta wordo benta den cel den un manera bruto y ta wordo kita entre otro su cartera y cellular mientras su camara a wordo kita fey dje for di cuminsamento. Despues di un par di ora mi tata ta wordo yama y wordo avisa cu por bay cas, pero cu e tin cu paga un boet di Afl. 2,300. Awor mi ta puntra paga boet pa kiko? Ki acto contra ley e a haci? Pa saca potret di polisnan den publico?

Tur esaki a tuma lugar den warda di polis mientras mi tata, cu sa su derechonan, a pidi pa papia cu fiscal y a wordo bisa cu e ta cu vakantie y cu no tin un vervanger disponible. Fiscal ta e autoridad cu por procesa un process verbal y mester splica e persona acusa ki ley e persona a kibra y splica kiko cu su derechonan ta pa contra aresta esaki. Awor atrobe mi ta puntra, con polis por schrijf uit un boet sin involucra un fiscal y sin splica y notifica ki ley precies e a overtreed? Un otro fout den precedura.

Ariba dje ora di sali for di warda di polis, mi tata a wordo nenga su cellular y camara! Supuestamente e no tabata tin camara ariba dje y cu nan no por haya su cellular.

Tur esaki ta pone bo yega na conclusion cu nan mes a realisa cu nan a haci fout y cu nan mester a crea y documenta un motibo pa asina cubri nan actonan cu ta contra ley!

Cada un di nos como cuidadano di Aruba ta paga salario di polis pa asina nan por garantisa ordo publico y duna cada un di nos e sintimento di seguridad ariba nos isla. Polis ta un institucion publico unda nos como pueblo tin e derecho y responsibilidad pa zorg cu polisnan ta bon educa y prepara prome cu nan por drenta communidad den uniform. E polis mester sa cu ley ta dune derechonan pa actua den casonan cu ta requiri su intervencion a base di bon juicio, pero no mester confundi esaki cu abo como polis ta ariba ley cu bo por haci y deshaci. E caso aki ta geef aan hopi duidelijk cu polis no sa con pa haci su mesun trabao y cu tin falta di liderasco y guia professional.

Mi kier laga sa cu e caso aki no lo keda te akinan y cu cosnan mester wordo poni back na ordo. Mester ta duidelijk pa nos ciudadanonan di Aruba cu cada un di nos tin derechonan humano estableci pa leynan internacional y cu tur pais, inclusief Aruba of Reino, mester cumpli cu ne. Y si autoridadnan local no por of kier tuma accion debido, cu esaki no lo keda keda te aki. Te cu mi sa, ainda nos ta biba den un rechtstaat unda cu tur cuidadano tin derecho y unda niun autoridad publico por hasi y deshaci sin consequencia. Y mi ta spera cu via e relato aki mi por pone e actonan di sucedido den publico pa asina pueblo por ta corectamente informa.