Oranjestad (buvo) Den e siguiente lunanan Deloitte Dutch Caribbean, su seccion di Human Capital Consultancy, Training & Assessments lo inicia cu un investigacion ariba e condicionnan di trabou na Aruba. E tarea aki ta wordo realisa ariba peticion di gobierno di Aruba. A base di e resultadonan di e investigacion menciona, gobierno di Aruba lo evalua su maneho y structura actual di salario y lo ahusta esaki si ta necesario.
E iniciativa aki hunto cu algun otro iniciativa di gobierno, tin como meta pa realisa un aparato gubernamental pro-activo, profesional y cu ta enfoca riba e cliente. Den e simannan cu ta bin lo haci un apelacion na e sector priva y e sector semi-priva pa di e forma aki nos por inicia cu e sondeo di salario. Organisacionnan rond Aruba por spera un solicitud pa forma parti di e investigacion concerni. Unabes esaki tuma luga e organisacionnan participante lo ricibi dos lista di pregunta cu por ser yena y manda bek pa Deloitte.
E prome formulario lo contene un lista di pregunta na unda e organisacion participante por yena informacion general tocante nan condicionnan di trabou. E di dos formulario ta trata preguntanan specifico relata na un asina yama “benchmark” di un variedad di funcionnan estableci. Organisacionnan cu forma parti di e investigacion aki lo ricibi un resumen anonimo di e resultado di e sondeo como intercambio pa nan cooperacion. Cu esaki un organisacion por evalua su propio pakete di condicionnan di trabou ariba un escala mas grandi, ariba e mercado di Aruba.
Land Aruba a yega na un palabracion cu Deloitte pa garantisa cu e informacion obteni lo keda anonimo y confidencial. E resultado di e investigacion lo ser trata anonimo y lo no contene ningun nomber di e organisacion of otro informacion di cual por deduci di cua organisacion e informacion ta bin. Deloitte lo comparti unicamente resultado anonimo di e analisis cu Land Aruba.
Despues cu e analisis di e resultadonan termina, lo destrui tur e datonan compila pa asina aki finalmente cumpli cu e palabracion haci cu gobierno di Aruba. Deloitte lo informa gobierno di Aruba di e organisacionnan cu lo forma parti di e investigacion aki, pero lo no comparti datonan individual. Cu participacion na e investigacion, organisacionnan participante lo contribui pa sigui profesionalisa e maneho di Departamento Recurso Humano dentro di e capa di sector publico di Aruba. Esaki finalmente lo mehora e servicionan cu gobierno ta brinda na comunidad y indirectamente lo garantisa un progreso positivo pa Land Aruba den su totalidad.
Pa mas informacion tocante e investigacion (y participacion na esaki) por tuma contacto libremente cu Sra. Esther Baaij of Sra. Maghalie van der Bunt- George via salarisonderzoek@deloitte.com of via number di telefon 582 6235. Tambe por tuma contacto cu un representante di Departamento Recurso Humano, Sra. Christina Geerman via number di telefon 522 9999.
Johnnyhabibe-Anchorman 