Den cuadro di e vision nobo pa museonan aki na Aruba, Minister di Cultura Otmar Oduber a haya un presentacion dialuna mainta for di Sr. Renwick Heronimo, lider di proyecto pa loke ta e union di e 5 museonan bou di un solo capa.
Minister di Cultura Otmar Oduber a indica anteriormente cu e vision nobo pa loke ta trata e diferente museonan independiente ta pa por pone tur bou di un solo capa, cual lo trece dinamismo pa e sector aki.
Durante e encuentro aki a papia riba e posibilidad grandi cu tin pa e museonan pariba di brug mirando e vision di Ministerio di Cultura. Ta trata aki di 3 museo cu ta bay tin un rol importante pa loke ta e relacion cu comunidad pa loke ta trata autentisidad, balor y den e forma con esaki ta relaciona su mes cu e balor cultural y balor economico di Pais Aruba.
Den e proximo 2 añanan lo bay tin 3 museo cu lo hunga un rol hopi importante den nos comunidad, poniendo enfoke riba e desaroyo di comunitarismo pa cu e museonan aki.
E museonan aki desde nan creacion a pensa riba e audiencia/bishitante, cu ta un elemento esencial pa e museo, unda lo mira un museo completamente diferente na lo normal. Aki ta trata di museonan cu ta carga e responsabilidad pa por educa e publico cu ta bishite .
Sr, Heronimo a splica riba e tarea y meta di cada museo, manera e ‘Museo di Comunidad’ ta bay bira un brug cu lo atrae e publico bishitante mas cerca di e diferente aspectonan cu tin den comunidad, manera e aspectonan cultural, di cushina, di artesania y otro cosnan. ‘Museo Industrial’ lo refleha loke ta un’ timeline’ di industrianan na Aruba, unda lo hiba e publico for di e tempo di oro te na e industria turistico, cu un acento hopi grandi riba loke ta e historia di refineria y Aruba den añanan 1950 y e ‘Museo di Carnaval’ cu ya ta un celebracion di comunidad y comunitarismo, colaboracion y creatividad, unda lo crea areanan caminda lo duna workshops pa tanto e local como e bishitante.
Esencia di e plan aki ta pa den tur forma involucra comunidad y e bishitante cu e diferente paketenan pa loke ta trata e diferente tournan cu lo bay existi pa cu e museonan y San Nciloas. Esaki lo ta un caracteristica di e museo, por ehempel e Museo di Comunidad lo bay traha cu ‘community curators’cu lo ta personanan cu lo por traha un tour ‘costum made’ di San Nicolas pa e bishitante sea local of internacional .
E plan pa e museonan pariba di brug ta sigur contribui na e desaroyo pa crea di San Nicolas e di dos capital turistico di Aruba, unda e coneccion di comunitarismo y turismo lo trece e sinergia cu e tursita di awendia ta desea di mira na momento nan bin vacaciona,
Johnnyhabibe-Anchorman 