Minister di Cultura Otmar Oduber a splica cu e proyecto Resona ta un proyecto cu Ministerio di Cultura y Departamento di Cultura (DCA) a carga desde cu e ideanan a bin dilanti y a bisa cu den henter e proceso aki tabata en busca di un di e ingredientenan cu lo por ‘link’ loke cultura ta significa na Aruba, pa trecele bek pa e generacion nobo cu ta esunnan cu mester mantene na prome lugar y carguele.
‘Pa hopi aña tabatin e pensamento cu ora ta trata di cosnan cultural tin biaha nan por wordo considera ‘chapo’, mas ainda ora e cultura ta basa riba folklore di hopi aña. Specificamente e proyecto aki lo pone enfoke riba e aspecto musical pa cancionnan tipico di pioneronan den cultura , unda cu artista, musiconan local hunto cu profesionalnan lo bini hunto pa traha riba un produccion completo pa por conserva e aspecto cultural folklorico aki di nos antepasadonan ,’ Minister Oduber a bisa.
Den e prome fase di e proyecto ‘Resona’ lo bay trece bek 13 cancion di autornan local cu ta importante den historia di Aruba pa loke ta trata cultura. Lo trece e cancionnan bek dilanti den voznan y den musica y tono di un generacion hoben y di e forma aki tambe duna tributo special na herencia cultural cu ta wordo presenta y cu por keda tambe.
Minister Oduber a indica cu un di e puntonan cu a bin hopi dilanti durante Cumbre di Cultura tabata pa por marca y documenta tur proyecto cultural cu ta wordo haci. Hopi biaha ta haci proyectonan pero ta lubida di documentanan, y ponenan disponibel pa comunidad di Aruba.
Den e caso aki e 13 cancionnan inmortal, cu lo wordo produci riba un calidad halto, lo wordo documenta y lo wordo poni den un produccion cu lo wordo poni disponibel pa comunidad di Aruba en general, e mandatario a splica.
Pa e mandatario ta un honor pa como e Minister encarga cu Turismo tambe,haci uso di e plataforma aki pa brinda e oportunidad pa hiba nos artista y profesionalnan local pa crusa frontera hunto cu Oficina di Turismo pa promociona loke ta di nos den exterior y asina aki expone e talentonan cu tin na Aruba.
Johnnyhabibe-Anchorman 