RECORDANDO PEDRO RAMON KROSENDIJK MIHO CONOCI COMO “DON RAMON” GRAN BALUARTE CULTURAL COMPOSITOR Y CANTA AUTOR

Posted: January 12, 2015 in Johnny Habibe

Don Ramon Krosendijk 31.01.1950 - 7-01-2015_IMG_6093

Oranjestad – Departamento di Cultura Aruba a ricibi noticia tristo cu dia 7 di januari 2015, otro gran baluarte di nos cultura Sr. Pedro Ramon Krosendijk, miho conoci como Don Ramon a bay laga nos.

Don Ramon ta naci na Aruba riba dia 31 di januari 1950 y a bay laga nos riba dia 7 di januari 2015. Yiu di Sr. Juan Krosendijk y Sra. Maria Teresa (Ninita) Sandoval q.e.p.d. Ta casa cu Sra. Maria Francin Lampe y nan tin 4 yiu Juan, Braulio, Rodrigo y Gabriela Krosendijk.

Na 1968 el a caba su MULO na La Salle College na Oranjestad. Despues a traha pa 10 aña na Directie Financiën. For di un edad hoben semper tabatin un pasion grandi pa musica. El a participa den coro na Santa Cruz. Don Ramon ta toca guitara y a haya les di canto cerca Sr. Rufo Odor. Como compositor e tabata un compositor completo cu por a crea letra y melodia.

Ora e compone cancionnan, nan semper ta cu letra, mensahe profundo y cu su guitara e tabata saca e melodia.

Na 1978 Don Ramon a participa na e prome Festival di Papiamento. Hopi ta esnan di nos artistanan Arubiano cu el a yuda, sea den forma di compone cancion, poesia of a compaña.

El a participa na 1979 na e Tumba Festival cu un cancion componi door di Sr. Tino Ruiz, titula “Dun’e Tur Cos”.

Na 1979, Don Ramon a ricibi un reconocimento di “Aruba Academy Award” como miho cantante cu a tuma luga riba diasabra 1 di december 1979 den Americana Hotel.

Ta bon pa menciona cu Don Ramon a gana e Festival OTI Antiyas Hulandes cu a tuma luga den Cas di Cultura cu su composicion “Mi Niño”, areglo musical di Roberto Montiel y Coro di Maybeline Arends Croes. Cu e cancion “MI Niño”, Don Ramon a representa Antiyas Hulandes riba dia 8 di december na aña 1979 den Teatro Academia Militar na Caracas. El e ser compaña cu un orkesta grandi di entre 70 pa 80 hende. Ora a tira lot, Don Ramon a haya number 1, caminda cu entre tur e participantenan a duna un tremendo presentacion. Resultando na di nuebe luga.

Despues a graba un disco 45 RPM cu un banda tabata e cancion “Mi Niño” y otro banda cu e cancion “Porque no puedo ser feliz”, ambos ta su propio composicionnan acompaña pa Argentine Express y graba na Watapana Recording Studio.

Pa Festival di Voz i Landia e tabata compone cancionnan pa varios di e muchanan. Tabata na 1982 durante e prome festival Voz-i-Landia, caminda cu e composicion “Cunucu di Seit” a gana

e prome luga. Cantica cu a ser interpreta pa Ferdinand Carrion, cu despues a bira un di e canticanan clasico na Papiamento.

Riba e LP produci na 1985 di Sr. Tino Ruiz, conocido musico y tocado di mandolin, Don Ramon a canta dos composicion di Tino cu ta “Cosnan Imposibel y “For di bista, ta for di curason”, ambos ta un bolero.

Un bunita recuerdo ta di nos ex-minister plenipotenciario y actual director di Relacion Exterior di Aruba, Sr. Edwin Abath, cu a participa na final di aña 1989 na e Festival di OTI, na Miami, cu

un cancion “Mi Viejo”, co-compone pa Don Ramon. Sr. Abath a participa cu e cancion aki, caminda Aruba a participa pa prome biaha como pais, pasobra for di 1974 pa 1988 Aruba tabata participa representando Antiyas Hulandes.

Na ocasion di 40 aña di Radio Kelkboom na april 1994, Don Ramon a presenta su propio CD cu ta yama “Cunucu di Siet”, produci pa Watapana Recording Studio cu ocho cancion compone pa su persona.  E prome cancion cu ta aparece riba e CD aki ta: 1.) “Recuerdo” arr. pa Hildward Croes, 2.) “Mi Bieuwnan” arr. pa Emile Kelkboom, 3.) “Luna Scondi” arr. pa Emile Kelkboom, 4.) “Bo Indecision” arr. pa Franklin Granadillo, 5.) “Mi Tera” arr. pa Franklin Granadillo, 6.) “Un Canto na mi Pais arr. pa Hildward Croes, 7.) “Boda di Safiro” arr. pa Hildward Croes, 8.) “Cunucu di Siet” arr. pa Franklin Granadillo. E produccion aki tabata cu areglonan musical orkestralmente di Hildward Croes y Franklin Granadillo.  Esaki tabata orkestral na estilo di Aldemaro Romero.

E CD ta un joya di un produccion netamente Arubano, cada cancion tin su historia y metanan firme pa conserva nos cultura, y tambe ta refleha nos hubentud pa no cambia nos identidad Arubano. Ta bon pa menciona cu e cunucu di siet tabata un cunucu e tempo ey existente di su tata Juan Krosendijk, caminda awe ta Monte Verde.

Den añanan 90, Don Ramon a compone varios cancion pa Srta. Debby Werleman pa por a competi na e Festival Un Canto pa Aruba su Himno y Bandera. Cancionnan titula “Speransa”, “Un Mainta Berenal”, “Un Canto di Paz”, “Bunita di e Pasco Aki”. Pa Debby Werleman, Don Ramon tabata un tata di musica, maestro den letra y cu semper un mensahe profundo den su letranan. Don Ramon a siña Debby canta tononan halto tambe pa por a canta cancionnan di mariachi. Srta. Debby Werleman ta agradecido na Don Ramon, kende a dune conseho pa ta hurado.

E produccion di e CD, “Aruba Sucursal di Shelo” na 1999 di Sr. Tino Ruiz tin varios cancion “Cunucu di Siet” y mas di Don Ramon riba dje.

Durante 1998 – 2001 Don Ramon tabatin un programa di radio di tur diasabra di 9’or pa 11’or di mainta cu yama “Terturlia Farandulero” via Radio Kelkboom.

Na 2003 den un produccion di DVD di “The Most Precious Gift” di Sr. Tino Ruiz , Don Ramon tabatin un calypso instrumental titula “My Lovely Black Lady”. Den e parti di splicacionnan di nos Ritmonan musical, manera wals, tumba, mazurka etc. den e DVD aki nos por aprecia e bos di Don Ramon den idioma Ingles y Papiamento.

Don Ramon hunto cu Gos Oduber y mas miembro a crea e reglamento pa e Festival Un Canto Pa Aruba su Himno y Bandera pa mustra importancia riba e contenido di e cancion. E interpretacion, ki frase den melodia, e cantante su mensahe, cua ritmo di nos cancionnan

manera dansa, tumba, wals, mazurka y polka por participa. Ki instrumento y no insulta y critica ningun hende, pero si por protesta. Reglamentonan cu te awe ta vigente den e Festival.

Tabata 2005 Edjean Semeleer ta acerca Don Ramon pa pidi permiso pa e por canta y graba e composicionnan di Ramon, e cancionnan “Recuerdo” y “Cunucu di Siet”. Y ta saca un produccion di CD. Edjean a experiencia Don Ramon como un persona di caracter calido y di pensamento profundo. Despues den su proyecto “Hey ta Pasco” Edjean ta pidi Don Ramon un composicion di cual “Pasco di Amor” a ser componi.

Na maart 2007 e Festival “Un Canto pa Aruba su Himno y Bandera” a ser dedica na Don Ramon Krosendijk pa su aporte, composicion y gran apoyo.

Cu un anhelo pa un di su yiunan sigui cu su pasion. El a conseha Gabriela su yiu mas chikito pa sigui cu canto. Na principio no tabata facil, pero despues cu Gabriela a participa den Sparkling Tour, por bisa cu un chispa a cuminsa brota.

Na 2010, Gabriela ta participa den Festival Un Canto pa Aruba su Himno y Bandera cu e composicion di su tata, Don Ramon titula “ Un Elogio na nos Himno y Bandera”.

Na 2012 Don Ramon ta compone un cancion titula “Pakico” pa Gabriela. Cu esaki Gabriela ta participa den e Concierto Unoca den Plata di 25 aña di UNOCA.

Banda di tur esaki Don Ramon tabata un persona cu talento grafico y tabata un bon desiñado riba computer.  Su creatividad artistico tabata biba den dje y ta un don cu el a nace cune.

Tambe Don Ramon tabata canta Tango, tabatin un bos excepcional.

Aruba ta perde otro gran baluarte di cultura, compositor, canta autor y un gran persona den Don Ramon Krosendijk.

Departamento di Cultura Aruba, Director, Staf y Personal ta extende palabra di condolencia na su mayor Juan, su Señora Maria, su yiunan Juan, Braulio, Rodrigo y Gabriela y demas famia, conocir y amigonan. Mundo musical Arubano ta di luto.

Advertise4

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s