Inmediatamente Sr. Johnny Scharbaay a indica cu DCA lo no solamente brinda sosten na e proyecto aki pero tambe lo traha hunto cu e creador y artistanan, mirando e balor cu e grupo aki ta duna na nos compositornan di antes cu a aporta na nos herencia musical.
E proyecto ta encera 13 cantica inmortal cu lo bay wordo poni den un bachi nobo esta areglo nobo, haciendo e mas atractivo pa e hubentud di awendia y e lo wordo interpreta pa artistanan hoben conoci. Esaki lo termina den un produccion final cu un presentacion pa scolnan y publico en general. E broche di oro lo tuma luga dia 18 di maart durante nos celebracion nacional di Himno y Bandera.
Intencion ta pa mantene nos herencia musical intacto, y graba e canticanan ariba un nivel halto. Esakinan mester wordo documenta, presenta pa scol y publico. Y mester bay sirbi como inspiracion pa motiva y educa nos hubentud, p’asina nos herencianan musical no bay perdi, pa e futuro generacion di Aruba.
Cu e proyecto aki DCA ta trece e importancia di continuacion, educacion musical y cultura hunto. Mediante e proyecto “Resona” ta bay duna inicio na reconocemento di diferente compositornan cu a aporta grandemente na desaroyo di e sector musical aki na Aruba.
Alabes ta crea e posibilidad pa nos artistanan hoben local haya e oportunidad pa aporta na un produccion dirigi na rescata y traspasa herencia musical. Ofreciendo oportunidad pa conscientisa riba herencia cultural, nos melodia y ritmonan local den nos comunidad.
Mas o menos un total di 13 artista local lo ta forma parti di e proyecto aki. Y un total di 13 cancion lo mester ta cla prome cu luna di maart e aña aki. Lo envolvi nos scolnan secundario y lo ta dunando presentacion pa publico. Algun di e artistnan local cu lo participa na e proyecto aki lo ta entre otro: Jersey Sofia, Michelangelo Koolman, Edjean Semeleer, Ester Santos Do Nascimento, Jeon (Jonathan Thiel), Edseline Figaroa, Vale Croes, Mitch Almary, Maya Marin, Rock a Flavor, Jeaniro Eisden, Jerino Ridderstap, Yvan Quandus y Jair Britten.
Johnnyhabibe-Anchorman 