Oranjestad-Lider di MEP Evelyn Wever-Croes a anuncia cu hasiendo uso di su derecho constitucional a manda hasi minister encarga cu ensenjansa algUn pregunta relaciona cu e dudanan rond di e seguro pa studiante na Hulanda.
“Ya pa 3 siman caba ta saliendo cantidad di insinuacionnan y acusacionnan serio den direccion di e minister, pa e forma con el’a atende cu e asunto di cambio di seguro di studiantenan na Hulanda. E forma con e destaho a wordo ehecuta a wordo cuestiona seriamente, pero mas aun, e minister su propio declaracion prome cu fin di anja a wordo bari for di mesa, pasobra e minister a declara hopi detayes cu no ta cuadra cu berdad.
Locual ta hasi e situacion mas serio ta cu e minister a scohe pa keda keto, y no reacciona, dunando asina e impresion cu e acusacionnan ta berdad.
Pesey, hasiendo uso di nos derecho constitucional mi a dirigi 10 pregunta na e minister encarga cu ensenjansa y puntre tocante e dudanan tras di tur esaki.
E minister a declara cu e compania cu a gana e bidding, InsureToStudy BV, tin amplio experiencia riba e tereno aki y ya tin 28 mil cliente. Pero investigacion publica den medionan di comunicacion a mustra cu esaki ta un mentira, mirando cu e compania a wordo incorpora despues cu e bidding a wordo anuncia, mientras cu un luna despues ainda su website no tabata cla ainda, y nan no tabata tin un linia di telefon duro, sino solamente un celular.
E minister no por kere cu e por keda keto, y ‘get away’ cu esaki, sin duna cuenta. Pesey nos a mand’e e carta y nos a pidi’e pa contesta nos mas pronto cu ta posible.
Si e minister no contesta nos carta den tempo corto manera nos a pidi, nos lo pidi Ministerio Publico pa condusi un investigacion den e caso aki, y especialmente ki rol Michelle Hooijboer-Winklaar y/of su esposo a hunga den e caso aki.
Ta basta caba cu tanto escandalo rond di e gobernantenan di Aruba. Ta berguensa cu nos tin un minister cu hues ta haya cu nos tur por yama pa corupto. Ta mas berguensa ainda cu e prome minister di nos pais ta sinta man crusa y no ta bisa nada. Pero ta dimas si minister Michelle Hooijboer-Winklaar kere cu e por keda keto y “get away” cu esaki.
Usualmente e compania di mercadeo cu minister Hooijboer ta paga hopi placa pa skibi articulo p’e, ta reacciona mesora ora ami cuestiona e minister, y pesey mi a dicidi di cuestiona e minister di e forma aki. Mi ta urgi e Minister cumpli cu su deber constitucional y contesta nos preguntanan mas pronto cu ta posible”, líder di MEP Evelyn Wever-Croes a duna di conoce.
Johnnyhabibe-Anchorman 