Minister Michelle Hooyboer – Winklaar  ta lamenta Evelyn Wever – Croes no ta interesa den hechonan relaciona cu seguro di studiantenan Ni e beneficio agrega pa studiantenan

Posted: January 16, 2015 in Noticiero 94

MICHELLE1

ORANJESTAD, Aruba – 15 di januari 2015: Desde final di aña pasa, Gobierno a anuncia cu a tuma un decision riba e destaho publico cu a tene pa seguro pa studiantenan na Hulanda. Un compania Hulandes a gana e destaho y desde 1 di januari 2015 ta encarga cu seguro pa nos hobennan studiando. E proceso a bay transparente y publico. Aunke cu a splica tur cos den Parlamento y den prensa, toch e fraccion di MEP a opta pa cuminsa un campaña di difamacion contra Minister di Enseñansa, Michelle Hooyboer-Winklaar.

E motibo principal pa organisa un destaho publico relaciona cu seguro pa studiantenan ta pa por a sondea un miho pakete cu miho tarifa y beneficio pa aseguradonan.

E mandatario a opta awe pa laga su abogado atende cu e corant y radio cu a tild’e di corupcion, mientras cu el a aclaria preguntanan di Parlamentario mr. Evelyn Wever haci via di media riba e compania di seguro Insure – to Study BV, cu ta resorta bao di e holding company Holding Jonker Schotte Adviesgroep BV estableci na Hulanda desde 1951. Bao di e Holding tin como compania Jonker Assurantien estableci desde 1985 y ta uza e handelsnaam Insure to Study BV desde varios ana caba.

Jonker Scheffer ta volmacht y a dicidi pa saca Insure to StudyBV y haci esaki un entidad na November 2014 pa e por carga e portofolio di tur studiantenan internacional, specialmente teniendo na cuenta e aumento grandi y substancial di studiantenan di Japon y Korea. Y Insure to Study BV ta representa Europese Verzekeringen cu ta un compania nacional di Gobierno Hulandes mes.

“Mi a tuma nota di e declaracionnan haci dor di Evelyn Wever Croes den un solo corant y tambe via un solo media, na unda e ta haci algun preguntanan descabeya y ta sigui fomenta odio den su sed di venganza. En bes di haci pregunta di caliber cu contenido y cu ta basa su mes riba berdad, e Parlamentario ta tuma honor na su mes di sconde tras di mentiranan fomenta dor di su propio medio”, Minister Michelle Hooyboer–Winklaar a duna di conoce.

“Evelyn Wever–Croes a trece argumentonan sin base y sigur sin tin e studiante na prome luga pero SI ta defende segun loke por comprende, un grupo cu a tuma un posicion “previlegia” pa 20 aña largo cu nunca a bay un destaho publico pa yega di ta e broker di seguro pa nos studiantenan”. Un biaha mas demostrando e vinculo y circulo di su persona y amigonan di partido MEP.

Ta pa e motibo aki despues di 20 aña a dicidi di caba cu e monopolio y habri e oportunidad via un destaho publico pa tur compania di seguro por participa. Y ta aki e dolor! A dicidi pa scoge pa mehoransa den e pakete di seguro y sigur yega na un polisa ahusta na beneficionan di e studiante y no beneficio propio na un bon tarifa.

“Ta bon pa pone di un manera concreto cu ningun hende di mi famia ta pertenece na e compania aki y ta haya ningun beneficio di e compania aki. Mi mayornan a lantami cu masha humildad y no tin espacio pa in-transparencia, mentira y nunca lo mi resorta na fabricacionnan cu finnan politico.”

Mas leu e mandatario a sigui splica cu Aruba Huis a atende cu tur studiante, a informa nan di e cambio y a haya masha bon reaccion di e pakete atractivo cu nan ta dispone di dje awor, cu un sin fin di adelanto y pagando hopi menos. Na  fin di dia ta e  ta spaar 1 miyon florin pa aña dor di cambia di broker.

“Pa mi no ta un sorpresa e atake vil y baho di Parlamentario Evelyn Wever–Croes, mi no ta spera nada otro for di su maneho y su sistema di hiba politica cu no ta cuadra cu mi pensamentonan. Kizas e no por imagina e funcion cu mi ta den ya cu nunca el a fungi den e cargo aki. Lo mi tuma pasonan legal contra e media di su escogencia y lo hiba tur cu tilda mi di corupcion na Corte!”, segun Minister Michelle Hooyboer.

Na final el a bisa di ta lamenta cu e lider di MEP Evelyn Wever-Croes ta haci uzo di e plataforma aki y no a siña ainda cu e berdad ta persigui tur mentira. “Y ami ta sigui e paso di Good Governance y nada otro”, segun Minister Hooyboer. “Corupcion ta valido pa otro hendenan cu kisas ta den e kring di Evelyn Wever Croes mes y mi ta reta su persona pa ban Corte y trece su pruebanan. Ya cu na momento cu bo kier tilda bo mester bin cu hechonan”.

ADVERTISE 3

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s