Johnnyhabibe-Anchorman

Dos aña pasa a haci un analysis di e strategia di MEP den oposicion. E analysis a mustra cu e unico meta cu MEP tin ta pa drenta gobierno. No importa con. Pa logra e meta aki nan ta capaz di haci tur cos. Hasta daña nomber di nos pais. E soño grandi di MEP ta cu lo gara un of otro miembro di AVP den parlamento of den gobierno den un of otro caso di corupcion. Pa MEP esey ta e “dream come true”. E motibo di esaki ta pasobra te ainda MEP no por biba cu e frustracion di tur e corupcion bou di gobiernonan di MEP cu a pone nan perde sosten di pueblo, dos eleccion tras di otro y a saca nan man for di caha di gobierno. E lema cu a pega riba MEP cu e ta un partido (y gobierno) di “friends and family”, te ainda ta persigui nan. Pa MEP e solucion pa tur esaki ta pa haya AVP den un situacion similar. E ora MEP por bisa: “Wak. No ta ami so ta corupto. Nan tambe.” Enbez di MEP wak corupcion como algo cu no mester sosode bou di niun partido of gobierno, pasobra e ta malo pa nos tur, MEP ta sigui busca revancha enbez di sanacion di nan mes. Nan kier pa tur e corupcion, nepotismo, abuso di poder, previlegionan na famia y amigo y enrikesemento personal, cu a sosode bou di nan gobierno, sosode cu otro tambe. Pa MEP esey ta loke mas nan ta desea. Ta pesey MEP ta wak corupcion tur caminda y no ta laga un dia bay sin tilda un parlamentario of minister di corupcion, abuso di poder of un otro mal echo.

PARALISACION POLITICO

E strategia y actitud permanente di vengansa den MEP, a paralisa e pensamento den e partido por completo. E partido di Betico Croes, Cesar Terzano of Guillermo Trinidad, no ta existi mas. No tin  idea, plan, sugerencia of un minimo di accion of pensamento positivo ta sali for di e partido. E paralysis politico di MEP tabata existi bou di liderazgo bieuw di MEP y a continua bou di e liderasgo nobo. Nada no a cambia. E hobennan den e fraccion actual den parlamento, lamentabelmente tampoco ta mustra niun creatividad of iniciativa nobo cu ta mustra riba un MEP cu kier kibra cu nan pasado egoista y scur. Menos aun nan ta parse di ta capaz pa goberna. Al contrario. E negativismo, e acusacionnan personal, e buscamento sin fin di cosnan personal den bida di otro hende, e sed pa poder y revancha, ta tur mescos cu e MEP cu a goberna nos pais pa mucho tempo y a hib’e na abismo di desaster.

Mientras otro partidonan politico y organisacionnan comercial, sindical y social ta busca inovacion pa Aruba riba tur tereno, MEP ta keda pega den pasado. Mientras gobierno y partidonan ta busca interes di henter pueblo riba tur tereno, sigur den tempo dificil cu mundo ta pasando aden, MEP ta sigui cu un strategia pa interes personal y di partido so. No pa interes di pueblo y pais. E acusacionnan diario di corupcion door di MEP no ta nada nobo. Ta esaki nan a haci pa añanan caba. Pero niun acusacion a resulta di ta berdad! Asina mes nan ta sigui. MEP ta pensa: “Tira pa loco. Ban spera cu algo lo pega.” Na fin di aña nan ta resumi tur nan propio mentiranan comosifuera ta cosnan cu di berdad a sosode y siui pinta un Aruba scur cu no ta cuadra cu realidad. E daño cu nan ta causa nos pais no ta interesa nan. Obviamente MEP ta keda wak nan propio interes enbez di interes di nos pais. Cu otro palabra, MEP a keda MEP.