Johnnyhabibe-Anchorman

Oranjestad-Cifranan di turismo pa loke ta 2014 ta conoci y e resultadonan ta sumamente positivo.

Minister Otmar Oduber durante conferencia di prensa hunto cu directonan di AHATA y ATA y tambe representantenan di aeropuerto, a comparti cu comunidad e desaroyo di nos turismo durante e ultimo 5 añanan mustrando un crecemento significativo pa loke ta trata nos industria principal.

El a inicia cu e parti di stay-over. Na 2009 Aruba a conoce un total di 812,623 bishitante y 5 aña despues na 2014 nos isla a conta cu un total di 1,072,082 bishitante, cual ta un crecemento di riba 200 mil bishitante of di 20% comparando 2009 cu 2014.

Pa loke ta trata pasaheronan crucero, na 2010 a ricibi 569,424 pasahero crucero na Aruba y na 2014 esaki tabata 666,451 cu ta rond di 100 mil turista crucero adicional. E top di riba 100 mil pasahero crucero a wordo logra na 2013. Maneho pa 2014 tabata pa mantene e crecemento conoci na 2013, pero a keda cortico cu 3%. Motibonan principal pa cu esaki ta cu Mundial di Futbol a tuma lugar na 2014 y 6 barco di Pullmantur a wordo cancela pa Aruba debi cu nan a usa e barconan aki como hotel na Brasil, ademas di otro cancelacionnan cu a conoce den e mesun direccion aki.  E mandatario a indica cu a pesar di e 3% cu a keda falta, a keda satisfecho cu logra casi mantene e grado di crecemento conoci na 2013 compara cu 2012 cu tabata uno hopi grandi. Ademas el a expresa cu ta premira cu durante 2015 lo mantene e cifranan pa loke ta trata nos bishitantenan crucero.

Minister Oduber tambe a comenta riba e RevPar (entrada pa camber disponibel). Na 2009 esaki tabata US$ 127.05 y na 2014 esaki a subi te US$ 185.46. Mirando e resultadonan aña tras di aña por mira un crecemento y comparando 2014 cu 2013, e RevPar a subi cu 20.6%, surpasando e meta cu a pone di crecemento di 9% pa e añanan nos dilanti. Si compara e crecemento di 2014 cu esun cu e mandatario a haya na 2009 ora el a asumi responsabilidad, por mira cu ta trata di un aumento di mas cu 60 Dollar of di casi 50%.

Pa loke ta trata e prijs di camber, ADR, na 2009 esaki tabata US$ 176.54 y na 2014 e la yega  US$ 233.85 cual ta representa un crecemento di 18% compara cu e ADR na 2013. Mirando e datonan di 2009-2014 por mira cu tur aña tabatin crecemento y ta pone cu Aruba compara cu Caribe por tin un nivel hopi mas halto.

Tambe a haci un comparacion pa loke ta trata e grado di ocupacion di hotelnan na Aruba. Aki por mira cu e cantidad di bishitante kedando na hotelnan a bin ta aumentando, esaki a pesar di e fenomeno di hendenan cu ta kedando mas den residencia, aparatamento y condominionan. Na 2009 e grado di ocupacion tabata na 72% y na 2014 esaki a crece te na 79.3%

Minister Oduber a menciona tambe e entrada cu turista ta laga atras den nos economia (tourism receipt). Na 2009 tabatin un caida di 9.5% y despues di esaki por mira e variantenan positivo cada aña di crecemento den e tourism receipt. Na 2013 a crece cu 7% compara cu 2012 y 2014 e prome dos kwartalnan conoci ta mustraya caba un crecemento di 4.9%. Den cifranan absoluto por mira un crecemento tambe for di 2.1 biyon na 2009 te na 2.6 biyon na 2013 cu ta representa un crecemento di riba mey miyon Florin pa loke ta e contribucion cu turistanan ta laga atras den nos economia.

Finalizando el a indica cu ta cifranan sumamente alentador y publicamente el a felicita cada un di e partnernan cu a contribui na esaki, pero tambe na tur e stakeholders, na tur esnan den e industria cu a contribui. “Nos no kier keda eynan, nos kier continua den e direccion cu nos a scohe den e ultimo añanan”.