Oranjestad-Den e congreso general di: CONFEDERACION CENTRO-AMERICANA Y DEL CARIBE (CCCAN), cu a tuma lugar na Vera-Cruz, Mexico den luna di November, na unda cu tabatin 29 federacion presente, Sra. Maureen Croes di Aruba a wordo elegi unanimamente como Secretaria General den e staf ehecutivo nobo, pa e periodo di 2015 pa 2019.Esaki ta un logro grandi pa un isla chikito manera Aruba.
Maureen ta un ex-landadora di Aruba.E ta un persona sumamente dedica , cu un conocemento amplio di e deporte, y cu ta percura pa keda semper na altura di tur acontecimentonan y cambionan técnico den e mundo di landamento en general. Actualmente su yiunan ta forma parti di e top-landadornan cu ta representa Aruba internacionalmente. Cu su contribushon profesional na e direktiva anterior di CCCAN, tabatin hopi bista riba su persona.
E direktiva nobo di CCCAN, bou normanan estricto di FINA,cu ta e órgano ehecutivo máximo den mundo di landamento , a nombra su representantenan den e comisionnan tecnico pa e cinco disciplinanan aquatico: landamento, landamento syncronisa, diving, waterpolo y open water. Dos oficial di Aruba a hanja nombracion pa ta miembro di e comisionan, y esaki ta un otro logro grandi pa nos pais Aruba.
Den e disciplina di landamento syncronisa a keda elegi Sra. Stella Leslie, y den landamento a keda elegi Sra. Mayens Tromp.
Sra. Stella Leslie a traha den e “Technical Committee” pa 8 anja como miembro di comishon di landamento syncronisa. Su persona ta “referee” certifica di nivel A di FINA y di UANA, cu hopi experencia local y internacional. Awor su persona tin e funshon di ta e presidente di e comishon tecnico di landamento syncronisa di CCCAN. Landamento syncronisa ta un deporte di nivel halto na Aruba, den region y mundialmente. Aruba ta den e topnan den e deporte aki.
Sra. Mayens Tromp a cuminsa traha como oficial na Aruba tempo cu su yiunan a cuminsa competi den landamento. Su persona ta un “starter” certifica pa FINA y di UANA, cu 25 anja di experencia local y internacional.Tambe e sa tin e tarea di ta e announcer na e competencianan organisa pa CCCAN, pa motivo di su dominio di diferente idioma. Ta prome biaha den historia cu Aruba ta hanja un representante den e comishon tecnico di landamento.
Sra. Mayens lo ta e unico persona femenino den e comishon tecnico di landamento pa e periodo aki.
Un di nos otro oficial den deporte di landamento, cu un trayectoria hopi largo, tanto local como internacional, ta Sr. Ronald Leito.Sr.Leito a logra algo historico pa Aruba,como cu e ta e unico oficial den Region cu tin Certificado International di FINA como Referee y Starter, cual ta e posicionnan cu ta lidera un competencia. Su persona tambe ta un oficial certifica di UANA.
Sr. Ronald Leito ta fungi como un oficial di AZB for di anja 1983, y cu su amplio experiencia
tambe a ehecuta trabounan den tur e otro posicionnan den competencia di landamento.
Durante e ultimo competencia internacional,esta CAC Vera-Cruz na Mexico, tur tres oficial tabata presente pa eherce nan trabau na un forma ehemplar.
Arubaanse Zwembond ta hopi orguyoso di tin personanan cu ta traha incansabelmente cu asina hopi amor y dedicashon pa e desaroyo di e deporte aquatico na Aruba, y ta desea di expresa nan aprecio y agradecimento na tur persona cu ta contribuyendo voluntariamente di un manera of otro pa engrandece nos deporte.
Johnnyhabibe-Anchorman 