Oranjestad-Diaranson atardi Minister Otmar Oduber tabata di bishita na Renaissance Hotel unda cu el a haya un recorido y splicacion di e desaroyo di e hotel na e momentonan aki.
E mandatario a keda sumamente contento di por mira con un compania local a bin ta invirtiendo den nos industria principal y logrando frutonan grandi.
Minister Oduber a indica cu pa basta tempo caba e tabata desea di bishita, manera tabata haci den pasado, diferente hotelnan y a haya e oportunidad di bishita Renaissance. “Inversionnan grandi ta wordo haci pa loke ta trata mantencion, pero mas cu tur renovacion di e diferente hotelnan. Renaissance ta un di nan cu un confianza grandi den e producto y mercado. Nan a caba di realiza un inversion di riba 21 miyon Dollar den renovacion di nan camber di ambos toren, ademas di renovacionnan cu nan ta haci continuamente di e diferente facilidadnan cu nan tin”.
Minister di Turismo ta considera esakinan inversionnan importante pa nos economia y tambe pa e meta cu a wordo poni di yega na un RevPar promedio di 9% den 4 aña. E renovacionnan haci no solamente pa Renaissance, pero tambe pa otro hotelnan manera La Cabana ta un muestra di e confianza cu tin den nos mercado y esey ta importante.
Durante e bishita e mandatario a haya oportunidad di conversa cu Paul Gielen, kende ta e gerente general di e propiedad cu a comenta riba kico lo ta e lunanan di 2015 pa loke ta grado di ocupacion. E aña aki ta mustra cu e ta bay ta hopi fuerte. Tin 2 luna cu ta mustra cu lo mester traha mas duro, pero en general e sentimento ta uno hopi positivo. Esaki ta wordo sinti tambe na otro hotelnan. Stabilizacion di mercado y economia Mericano ta hunga un rol importante aki, mirando cu ta pronostica cu 2015 lo ta un aña cu Mericanonan lo biaha hopi. Ademas di esaki e mercado Venezolano, cual tin su retonan, pero toch ta sorpresa tur dia. “Mi ta kere cu nos ta bay tin un tremendo 2015 y nos lo sigui fomenta pa e tipo di inversionnan aki sigui tuma lugar. Pesey mi ta considera importante tambe cu e RevPar Committee a entrega su recomendacionnan riba cual cada un actor na Aruba sa cual ta e responsabilidadnan pa e añanan nos dilanti, tanto Gobierno, oficina di turismo, aeropuerto y tambe hotelnan y sector priva na Aruba”.
Johnnyhabibe-Anchorman 