Oranjestad-Ministerio di Cultura ta pone enfasis pa promove, educa y concientisa comunidad y future generacionnan riba loke ta nos herecia tangibel cu ta edificiona monumental rond di nos isla.
E maneho di cultura nobo ta pone hopi infoke pa conserva y restaura nos monumentonan. Cu tambe ta forma parti di mehora nos calidad di bida pa nos hendenan local y bishitantenan.
Minister di Cultura na varios ocasion a indica cu nos mester duna importancia na monumentonan, mirandi cu nan ta carga aspectonan valioso di e identidad cultural di nos pueblo. Nan ta parti integral di nos Herencia Cultural tangibel cu nos mester conserva, restaura y cuida, pero mas ainda promove conocemento di historia, pa grandi y chikito siña conoce tur esaki y pas’e pa futuro generacion.
Directora di Monumenten Fonds Aruba Sra. Anne Wtseburg a splica riba e importancia pa finalmente logra e traspaso di Califoronia Ligthouse despues di hopi aña.
Esaki ta un e cumiensio di un periodo di hopi trabou pa e team di Monumenten Fonds.
‘Nos ta hopi orguyoso di por a cumpra e lighthouse y lo bay inverti hopi placa pa restaura esaki na su estado original, Sra. Anne Witsenburg a bisa.
Pa logra haci e proyecto aki realidad Monumenten Fonds ta conta cu e sosten financiero di National Restauratie Fonds na Hulanda, cu a duna nan un prestamo cu un interes hopi abou pa asina aki yuda pa logra e meta di restauracion di e faro.
Hunto cu arkitectonan IMD Aruba, Monumenten Fonds lo bay diseña e restauracion di e faro, unda ya caba tin un masterplan, pero awor mester desaroya esaki for di e master plan te na un diseño . Esaki ta inclui e investigacion historico pa loke ta trata detayenan di California Lighthouse. E proceso di diseña lo tuma mas o menos 3 luna y lo pasa despues pa prepara e destaho publico.
Una bes cu esaki tuma lugar y dicidi riba e contratista cu lo percura pa restaura e faro, e proceso aki lo tuma total 6 pa 7 luna pa tin e faro bek na un estado original.
Ta premira cu California Lighthouse lo por habri na fin di 2015 bek pa publico.
Monumenten Fonds ta gradici Minister di Cultura Otmar Oduber y tur stakeholders y tur partner cu a aporta na e proyecto y ta yuda pa concientisa Aruba y bishitantenan di e historia y herencia cultural.
Pa Ministerio di Cultura e restauracion di cada un monumento ta forma un parti hopi importante di nos Herencia Cultural, Historico y Nacional. Y ta haci esaki unico pa nos pais.
Johnnyhabibe-Anchorman 