Entrante 1 di maart aerolineanan mester ta al dia cu pagonan na ATA, ANSA y AAA Si no por tuma pasonan cu por yega hasta trek in permiso di aterizahe na Aruba

Posted: February 4, 2015 in Johnny Habibe

Personal

Oranjestad-Minister Otmar Oduber a reuni diamars atardi cu ATA, ANSA, Departamento di Aviacion Civil y AAA mirando cu cada un di e institutonan aki ta keda confronta problemanan pa loke ta trata aerolineanan cu ta bula pa Venezuela (tanto aerolineanan Venezolano como local y otronan cu ta transporta pasaheronan for di Venezuela) pa cobra e PFC (aeropuerto), TPL (ATA) of e entrada cu mester wordo cobra pa ANSA.

A yega na un conclusion en comun, pasobra ta asina cu tur aerolinea ta pagando cu excepcion di un par local, como tambe esnan cu ta bin for di Venezuela. A keda palabra cu mirando cu a duna hopi oportunidad te awor aki y hasta a brinda oportunidad pa areglonan di pago y sin embargo no ta cumpli cu esakinan.

E mandatario a duna ehempel di algun cu tin hasta mas di 12 luna sin cumpli cu pagonan di ATA, otronan cu no a cumpli cu pagonan na aeropuerto pa 3 of 4 luna y awor cu ANSA ta den su prome luna ya caba por mira cu ta e mesun aerolineanan no ta cumpliendo cu e pagonan.

E decision cu a yega na dje conhuntamente ta cu den e beleidsvoorwaardenan cu tin pa loke ta trata e landingsrechten na Aruba, cu lo haci un adaptacion eynan (e siman aki e mester tuma lugar) y otro siman lo notifica e aerolineanan cu parti di e condicionnan pa por tin permiso di aterizahe na Aruba ta cu mester cumpli y mester ta al dia cu e diferente pagonan cu mester tuma lugar na e diferente instancianan.

Minister Oduber a bisa cu esaki lo bira un ‘dwang middel’ pasobra no ta husto pa cu e otronan cu si ta cumpli, ademas e por trece na peliger e pago di esnan cu si ta cumpliendo manera esunnan Mericano y Europeo.

Tambe el a bisa cu DOT (Department of Transportation) di Merca tabata di bishita na nos isla dos siman pasa netamente riba e cobranzanan aki pa ta sigur cu nan ta tuma lugar na un forma husto y cu tur hende ta pagandonan y si mañan resulta cu tin hende cu no ta pagandonan, e por crea un problema cu e aerolineanan cu si ta cumpliendo na e momentonan aki.

Pa tal motibo e ta remarca cu si aerolineanan no ta al dia cu pago cu un di e tres institutonan en cuestion (ATA, AAA, ANSA) por trece cune sancionnan y hasta e permiso pa ateriza na Aruba por wordo ingetrokken.

Riba e pregunta si e decision aki lo por tin consecuencianan pa turismo for di Venezuela cu ta nos di dos mercado di mas grandi, Minister Otmar Oduber a indica cu si no atende cu e situacion aki e por bira un problema pa henter e industria turistico di nos isla. Esaki pasobra ora aerolineanan Mericano scucha cu nan si ta cumpliendo al pie de la letra, pero esunnan Venezolano por ehempel no ta cumpliendo, por significa e ora cu a base di e acuerdo di gelijkheidsbeginsel cu ta existi, nan por bisa cu sea nan no ta pague of nan ta stop di bula pa Aruba.

“Mi ta kere cu bo no tin cu castiga esunnan cu si ta cumpliendo, bo mester pone regla y nos ta duna espacio na e aerolineanan cu cierto flexibilidad of areglo di pago, pero no por ta asina cu companianan debe mas cu un aña y no ta pagando na e momentonan aki. Tin aerolineanan cu debe casi 1 miyon caba na ATA, tin otronan cu debe casi mey miyon na aeropuerto di Aruba. Esaki ta algo cu nos kier stop y pesey ta introduci e regla aki, hacie conoci den un nota cu ta bay na tur e aerolineanan cu ta haci negoshi cu Venezuela y di e forma ey nan sa cu desde prome di maart lo cuminsa cu e maneho aki”, Minister Otmar Oduber a duna di conoce.

ADVERTISE 3

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s