Oranjestad – Departamento di Cultura Aruba ta anuncia cu “Fiesta den Caya” ta inicia awe diaranson 4 di februari for di 6’or di atardi te cu 9’or di anochi den nos Caya Grandi di Oranjestad.
Esaki ta un ambiente cultural cu a inicia desde luna di november di aña pasa riba tur diaranson y awor ta bay sigui durante e aña aki.
Un proyecto no solamente pa promove nos cultura, sino tambe pa duna apoyo y stimula nos comercio den Caya Grandi. E meta ta pa crea un anochi cultural y placentero yena cu musica, baile y hacimento di compras dirigi riba nos bishitante di barco crucero y esnan cu tin estadia mas largo. Creando asina un sinergia entre nos hendenan local y turista.
Mas cu claro e anochinan aki ta pa deleita nos hendenan local cu presentacion di nos gruponan local. Bini y escoge un bunita regalo di San Valentino pa bo ser keri.
E “Fiesta den Caya” di e siman aki ta brinda cuater situo di entretenimiento cu ta Plaza Nicky Habibe, Maggy’s, Parkinglot “La Linda” y Plaza Daniel Leo. Ambiente ta cuminsa for di 6’or di atardi. Lo tin presentacionnan di “Ola Tropical, Daisy’s Dancers, Steel Edition, Candylicious, Jairo Disco, caha di orgel “Nos Cultura” y Tico y sus Estrellas.
Pa 8:30 di anochi lo tin den Caya Grandi “Quality Brass Band” cu lo sali for di Plaza Daniel Leo bay pa Plaza Nicky Habibe creando un ambiente di carnaval.
Cu e proyecto aki tanto Ministerio di Cultura, ATA y DCA ta promoviendo nos cultura cerca na nos bishitantenan y deleitando nos hendenan local cu un ambiente sin igual tur diaranson.
Johnnyhabibe-Anchorman 