Age Bakker (Cft): ‘Mester eliminá retraso den pago na SZV i APS pronto’

Posted: February 24, 2015 in Noticiero 94

CFT SXM Press Briefing Feb 24 2015 -01-2

Oranjestad-Philipsburg – Sint Maarten a kumpli ku e deadline di yanüari pa aprobá su presupuesto di 2015. Cft ta konkluí sinembargo ku no a tene tur rekomendashon duná riba e konsepto di presupuesto na kuenta. E montante presupuestá di ANG 445 mion komo entrada ta mas haltu ku e ANG 426 mion rekomendá, ainda no a eliminá e retraso den pago na SZV i APS kual ta eksistí pa basta tempu kaba, i no a kompensá défisitnan di e añanan anterior. Cft a tene reunionnan konstruktivo ku gobièrnu kon ta bai resolve e sobrá puntonan di atenshon aki.

Kolegio di supervishon finansiero (College financieel toezicht – Cft) a bishitá Sint Maarten dia 23 i 24 di yanüari, loke por sierto tabata e promé bishita na Gabinete Gumbs. E Kolegio a reuní ku Gobernador, Promé Minister interino, Minister di Finansa, Konseho di Minister i e Komishon Fiho di Finansa di Parlamento. E tópikonan prinsipal ku a keda diskutí tabata e resultadonan di e presupuesto di 2014 i follow-up riba e rekomendashonnan di Cft riba e konsepto di presupuesto di 2015. Gobièrnu di Sint Maarten tin tempu te 2 di mart pa mustra Cft ku e puntonan di atenshon ku a sobra den e presupuesto di 2015 lo keda atendé na tempu i den un forma korekto, i ku e presupuesto ta kuadra ku e stipulashonnan di e Lei di Konsenso di Supervishon Finansiero.

Presupuesto 2014

Gobièrnu a informá Cft ku datonan preliminar di Gobièrnu ta indiká ku e entradanan di 2014 lo yega na un montante di ANG 430 mion. E presupuesto ta indiká un défisit moderá di mas o ménos ANG 8 mion. Cft ta warda e sifranan final pa un analisis mas aleu.

Presupuesto 2015

E presupuesto 2015 a keda aprobá pa Parlamento i firmá pa Gobernador fin di yanüari, na tempu ainda promé ku e deadline posponé di 31 di yanüari a pasa. Cft a indiká tres punto di atenshon pa ku e presupuesto ei. Na promé lugá e entrada a keda proyektá na un nivel di ANG 445 mion, loke ta mas haltu ku e resultadonan di añanan anterior. Na di dos lugá no a eliminá e retraso den pago di aproksimadamente ANG 200 mion na prinsipalmente SZV i APS ainda, kontrali na kompromisonan hasí anteriormente. Presidente  di Cft a ripití su preokupashon tokante di e punto di atenshon pendiente aki. Na di tres lugá défisitnan di for di 10-10-10 a akumulá te un total di aproksimadamente ANG 55 mion, loke mester keda kompensá. Cft a manda su konseho riba e presupuesto aprobá di 2015 pa e minister di Finansa, kende awor tin te 2 di mart pa reakshoná riba e rekomendashonnan di Cft.

A diskutí tokante di posibel solushon durante di e reunionnan ku Gobièrnu. Gobièrnu lo entregá dokumentashon pa sostené e kresementu di entrada kalkulá riba ANG 15 mion. Cft ta monitòr realisashon di e entrada riba e promé kuater lunanan di 2015 pa determiná si e kresementu aki ta hustifiká. Pa loke ta trata e retraso den pago na SZV i APS, a akordá ku lo paga esaki promé ku fin di mei. Cft lo revisa e resultadonan durante di su próksimo bishita na yüni i lo diskuti e kompensashon di e défisitnan di e añanan anterior.

Aserkashon di mas aña

Sint Maarten ta preparando un dokumento di vishon di mas aña pa hisa entrada i realisá un surplus prespuestario entrante 2016, pa kompensá e défisitnan di e añanan anterior. E dokumento ta konsistí di kuater parti: un programa di desaroyo ekonómiko, reorganisashon di ofisina di impuesto, adaptashon di leinan di impuesto, i un programa di subimentu di entrada i bahamentu di gastu. Cft ta aploudi e aserkamentu di mas aña aki. E Kolegio a konsehá Gobièrnu pa enbolbí un outoridat eksterno independiente pa revisá e plannan i brinda un stempel di aprobashon komo eksperto. Esaki ta hisa konfiansa tambe serka e públiko i lo mester atraé invershonista privá, ya ku Gobièrnu no por ehekutá e plan aki su so.

ADVERTISE 3

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s