“Un pais cu reconose su lidernan, lo crese, y Aruba a demostra diaranson cu Betico Croes den felis memoria merece tur elogio y reconosemento. Actividadnan rond di nos isla especialmente na Santa Cruz, Piedra Plat, Savaneta, y Arcivo Nacional tabata hopi bon bishita. Trafico den tur tres direccion pa Santa Cruz tabata congestiona practicamente henter dia. Y apesar di e polemica cu e color nobo di e bandera, ta hopi hende a hisa nan bandera di color original cu orguyo. Por cierto nos a avisa Gobierno y especialmente minister Otmar Oduber cu bo no por yega cambia e color sin mas, pasobra pueblo lo no acepta e color nobo sin mas, y a keda comproba cu pueblo a rechasa e color nobo cu ta mas scur cu esun cu tur Arubiano ta identifica nan mes cune pa casi 40 anja.
Critica nunca ta falta, y e anja aki e critica tabata riba e hecho cu gobierno di Aruba no a duna ningun reconosemento na Betico Croes, esun cu a lucha pa realisa nos Himno y nos Bandera. Pero esaki ta algo cu nos a bin ta mira structuralmente desde 5 anja caba, cu gobierno ta crea un polemica semper rondo di e dia importante aki. Pero ni asina a desanima e pueblo. Pueblo a hisa su bandera color original, y a canta su himno cu orguyo. Pabien Aruba cu un bunita celebracion di Dia di nos Himno y Bandera”, ta palabranan di lider di MEP Evelyn Wever-Croes
Johnnyhabibe-Anchorman 