Oranjestad-Mayoria di persona cu yega na Mary Joan Foundation (MJF) tin e mes un comentario: “Miho mi a yega aki mas prome. Lo mi a scapa mi mes hopi sufrimento.” MJF tin como tarea principal pa duna sosten na esnan diagnostica cu cancer na pecho. Servicio brinda ta completamente gratis, como tambe confidential. Esaki ta den forma di dos profesional esta un trahador social y un psicologo. Fundacion ta yuda na guia, informa y splica mas ariba preguntanan cu nos clientenan tin. Mas informacion y comprendemento un persona tin over di su malesa mas miho e por adapta na e trayectoria di biba cu cancer. E sosten aki no ta solamente pa e cliente pero tambe tin session cu e famia y esnan cu ta cuida e persona malo na cas.
MJF ta duna sosten den e sigiente manera:
Trahador Social
Psicologo
Therapia den grupo
Actividad caminda sosten di cliente pa cliente ta wordo promovi
Un di nos lemanan ta: “No enfrenta cancer di pecho bo so!” Mary Joan Foundation tey pa yuda bo. Enberdad e ta un momento hopi dificil ora wordo diagnostica pero e ayudo como tambe comprencion y atencion semper tey pa tur esnan cu yega serka nos fundacion.
E otro tarea di MJF ta informa y educa nos comunidad ariba e topico di cancer na pecho y saminacion propio. Educa y informa ariba sintomanan ta hopi importante. E ta yuda un persona reconoce cambio nan na e pecho na tempo. Mas trempran cancer di pecho wordo diagnostica mas chens di biba un persona tin. Sea alerto na cambio nan y siña conoce bo curpa. Detecta cancer di pecho na tempo por salba bo bida. MJF tin diferente foyeto di informacion y nos oficina semper ta habri pa brinda e servicionan menciona.
Pa mas informacion por tuma contacto cu nos na 588-9999 of pasa libermente na Sabana Blanco # 8. Tambe por sigui nos ariba Facebook: Mary Joan Foundation Aruba.
Johnnyhabibe-Anchorman 