ORANJESTAD, Aruba 29 di Maart 2015: Relaciona cu e accidente cu a sosode Diasabra unda un turista a bin muri inesperadamente durante un jeep tour, Gerencia di ABC Tours kier expresa palabranan di profundo condolencia na e famia di e persona cu a fayece.
ABC Tours ta un compania cu tin 20 aña di existencia y esaki ta prome biaha cu un hecho lamentable manera esaki ta pasa.
Despues di un investigacion haci pa Cuerpo Policial, a constata cu tur cos tabata bon cu e auto y na ordo. E accidente aki a sosode pa motibo di un mal maniobra y no tabata tin di haber cu e estado di e jeep.
Pa aclarea kico a sosode, ABC Tours kier informa cu e turistanan aki a yama e compania pa book nan excursion, cual ta mescos cu hopi otro excursionnan caminda cu e participante mes ta core su vehiculo, sea un Jeep, ATV of UTV cu ta bay “off road”. E tipo di excursionnan aki ta excursionnan caminda e clientenen mes hopi biaha por scohe pa core nan jeep.
Ora cu e turistanan a yega ABC Tours, mirando cu esun cu tabata pa stuur e jeep ta un dama, a puntr’e si e tabata desea e asistencia di un driver. El a contesta cu e mes kier a core e jeep y consecuentemente a brind’e e opcion cu e tabata desea, pa e mes core e jeep. Esaki ta algo cu e turistanan sa haci frecuentemente tambe cu otro companianan na Aruba. Nan a firma un acuerdo y a bolbe puntra nan si nan tabata confortabel pa core e jeep y nan a confirma esey.
Lamentablemente, durante e tour, e accidente aki a pasa na final di dia, pero mester enfatiza cu henter dia a core e auto sin problema. Tabata tin diferente parti “off road” manera patras di Lighthouse bay ariba, cerca di Kapel, etc, pero tur cos a bay trankilo.
Ta hustamente despues di e di dos parti di e tour, den e ultimo parada cual tabata Conchi, subiendo e sero, eynan ta caminda cu e chofer a haci un maniobra straño cu e auto cu consecuencia cu e jeep a bin atras y bolter. Ta di e manera aki cu un di e personanan den e jeep a bin fayece.
Gerencia di ABC Tours ta aclarea cu tur su jeepnan ta gekeurd y esey tambe nan a mustra polis na momento cu e accidente a tuma lugar. No tabata tin nada anormal cu e jeep y locual a pasa tabata un accidente unda cu probablemente e seatbealt di e victima no tabata debidamente ahusta. Tambe riba GPS a comproba cu e jeep no tabata coriendo duro.
Banda di esaki ta pone claridad riba e hecho cu e seguridad di e clientenan semper ta na prome lugar y pesey nan autonan ta wordo revisa constantemente, pa seguridad y confort di nan guestnan.
Gerencia como staff di ABC Tours ta lamenta e sucedido inmensamente y ta expresa palabranan di solidaridad cu e famia di e turista cu a fayece.
Johnnyhabibe-Anchorman 