Johnnyhabibe-Anchorman

Oranjestad-Parokia La Birgen di Fatima na Dakota ya pa algun aña caba ta introduciendo e custumber di “bendicionamento di lamchi” pa e fiesta di Pasco di Resureccion. E motibo ta pa nos muchanan, nos mes, nos famianan y bisiñanan por siña celebra na un miho manera e fiesta di Resureccion di nos Señor Hesus, cu ta nos Salbador y cu ta E Lamchi bendiciona.

Riba Diahuebs, 17 april, despues di Misa di Ultimo Cena tin e oportunidad pa cumpra bolo den forma di lamchi na balor di 10 florin.

Bendicionamento di lamchi

Bendicionamento di lamchi ta tuma luga durante oracion di Liturgia di Ora, esta Lauden, riba mainta di Diasabra di Aleluya, 8or. Despues ta hiba lamchi bendiciona cas y ta lag’e gorda su curpa pa su mañan.

Celebracion cu lamchi bendiciona

Diadomingo, Pasco di Resureccion, sea ta desayuno, sea merdia of atardi, depende con famia ta reuni, ta pone e lamchi meymey riba mesa. Ta pone lamchi den macutu of scalchi y dorn’e por ehempel cu un poco yerba berde, webo herbi of di mangel/chuculati.

Despues di comemento como pasaboca nos ta parti e lamchi asina pa cada hende haya un pida.

Lamchi dorna poni meymey di mesa por provoca hende pa puntra: “hey e lamchi pakico e lamchi?, di unda e lamchi?” E ora tin chens pa splica e historia di nos salbacion, tin chens pa evangelisa durante e cuminda principal di famia.

Historia/Motibo

Den e mundo tin diferente signonan. Signonan cu mundo Cristian ta uza y signonan cu mundo pagano tambe ta uza. Y nos ta riparando con e mundo pagano kier guli fiestanan Cristian cu su materialismo, cu su feroz propaganda na su estilo.

Asina por ehempel fiesta di Pasco Grandi poco poco ta cuminsa bira un fiesta di conenchi, ta keda relaciona cu fiesta di conenchi.

Conenchi awendia ta un simbolo di playboy, un simbolo di sexo. Y realmente esaki tambe ta simbolo antiguo di conenchi. Di e forma aki un fiesta Cristian di sacrificio, di entrega di Dios, pues ta keda resumi na un simbolo bastante straño, pa locual ta bida Cristian, un simbolo totalmente pagano. P’esey nos kier remarca nos propio simbolonan, nos propio signonan di mundo Cristian, di bida Cristian. Y e lamchi ta e expresion di henter misterio di Pasco.

Simbolo di lamchi

Den lectura di Exodo 12, 1-14 nos por lesa con Dios a pidi Israel pa sacrifica e lamchi, con e lamchi ey tabata imagen di Lamchi di Dios.

Den lectura di Huan 1, 29 ta cita: Ora Huan a mira Hesus, el a bisa: “Ata E Lamchi di Dios cu ta kita pica di mundo!”

E lamchi manera nos a resa den oracion durante Santo Sacrificio Eucaristico, traha di hariña di pan, manera Cristo cu a bira pan cu ta duna bida.

Pasobra Hesus a bira E cuminda y E lamchi tambe cu nan mester a come pa haya forsa. Pues si lamchi ta traha di hariña di trigo, tin mas nificacion ainda, pasobra tin relacion cu Eucaristia, cu Cristo cu a bira pan cu ta duna bida.