Oranjestad-Biblioteca Nacional Aruba a organisa un workshop di Fotografia pa 60-plus poco dia pasa. Esaki tabata un workshop di 6 siman. Tabata un combinacion di un curso online y encuentronan na biblioteca pa papia riba tarea y otro topiconan. Participantenan a sigui un curso online di 4 siman via www.open2study.com titula ‘The art of Photography’. E lesnan ta wordo duna pa medio di tutorials y otro material pa lesa riba Internet. Participantenan a topa otro 1 biaha pa siman pa studia composicion di otro. Cada siman participantenan a saca potret di 6 diferente tema.
Cada participante por a explora e tema cu su creatividad. Esaki a resulta den un coleccion di potret unico. Publico por wak un seleccion di e potretnan den hal di biblioteca na Playa di: Armand Hessels, Edwin Martinus, Gina Jie Sam Foek, Harold Heyliger, Ricardo Wever, Shirley Jacobs-Winklaar y Tito Sapuana.
Biblioteca ta ofrece diferente curso cortico y tayer pa adulto y lo sigui haci esaki en combinacion cu cursonan online hopi interesante, e asina yama MOOC’s (Massive Open Online Course). Participantenan por sigui e cursonan aki na cas, den nan mes tempo. Loke mester ta un computer y acceso na Internet pero si no tin esaki por bay den sala di computer di biblioteca. Esaki ta un servicio gratis di biblioteca.
Johnnyhabibe-Anchorman 