Oranjestad-Jossy Tromp, actualmente rector saliente di Colegio Arubano, a presenta tres obra literario cu el’a skibi na Biblioteca Nacional siman pasa.
Den un sala completamente yen, den presencia di su famia y conocirnan, e presentacion oficial a tuma lugar. Presente como representante di Parlamento di Aruba tabata Evelyn Wever-Croes, lider di fraccion di MEP.
Mirtho Lacle tabata e maestro di ceremonia di e anochi aki, dedica na dia internacional di poesia y teatro, y a sa di cautiva e atencion constante e publico na su forma unico. E presentacion di e obranan di Jossy Tromp tabata na encargo di Elton Lioe A Tjam, ken a hiba un entrevista cu Jossy Tromp, y asina a comparti detayes di e tres obranan.
E bukinan tabata na benta tambe pa 10 florin, y e gran mayoria di e bukinan disponible a bai.
“Mi ta contento di por a forma parti di e anochi aki, cu tabata uno sumamente interesante y sigur tambe inspirativo. Mi ta felicita sr. Tromp cu e tres bunita obranan, especialmente pa su perseverancia, pasobra apesar di su trabou pisa como rector di Colegio Arubano, e por a traha tempo pa completa e obranan. Un di mi deseonan ta pa skibi obranan literario, talves despues di mi carera politico mi tin poco mas tempo cu mi por dedica na esaki”, tabata palabranan di sra. Evelyn Wever-Croes, lider di MEP.
Johnnyhabibe-Anchorman 