Oranjestad-Tur aña den luna di April y Mei Koningin Wilhelmina Fonds Aruba ta tene su colecta anual pa recuada fondo pa asina por sigi brinda comunidad su servicionan. E fin di siman aki e hobennan di Kiwanis Builders Club, Rainbow Girls y Key Club a subi caya pa asina duna nan aporte na nos comunidad. E hobennan tabata hopi entusiasma cu e respaldo cu nan a ricibi di e publico na e diferente localidadnan cu nan a para pa asina tene e colecta.
Durante henter luna di April te cu 15 di Mei e colectantenan lo ta riba caya na diferente supermercado y tambe na luznan di trafico y rotondenan. Tambe lo tin e damanan di KWF kendenan lo pasa na diferente negoshi y otro instancianan pa asina colecta nan contribuicion anual. Nan tin badge di KWF bisti y ta duna un recibo como comprobante cu e contribuicion a wordo haci. Tur colectante por wordo reconoci door di e schort cora cu nan tin bisti, nan badge cu e logo di KWF Aruba y tambe e collectebus shinishi cu e logo riba dje.
Cu e fondo cu keda recauda KWF Aruba lo sigi yuda pashentnan di cancer y nan famianan. Aporta pa nos por sigui yuda comunidad. Nos tin e.o. servicio di thuiszorg, nos por yuda e pashentnan haya prothese y peluca y nos tin gruponan di sosten. Pa mas informacion of si abo tambe kier duna bo aporte, tuma contacto cu nos Centro di Informacion na 5820412 of riba nos FaceBook Koningin Wilhelmina Fonds Aruba.
Johnnyhabibe-Anchorman 