Oranjestad-E resultadonan mas recien di e estudio di BREA, Business Research and Economic Advisors, cu ta compara e resultadonan di turismo crucero di 2009 cu 2012 ta mustra un crecemento di casi 10% den e placa laga atras pa pasaheronan crucero na nos isla.
Minister Otmar Oduber ta mustra su satisfaccion pa cu e resultadonan di e rapport di BREA relaciona cu turismo crucero unda por mira cu e averahe di gastonan pa pasaheronan crucero den miyonnan di Dollar a bay di 87.41 na 2009 te na 95.44 na 2012, cual ta representa un aumento di 9.2%.
Mescos por mira e cantidad di placa gasta pa e tripulacion cu a bay di 69.34 Dollar na 2009 te na 101.10 Dollar na 2012, cu ta un aumento significativo di 45.8%.
Mester remarca cu e resultadonan sumamente positivo pa nos isla a tuma lugar prome cu 2013, aña durante cual nos a conoce e cifra record den cantidad di bishitantenan crucero. Si por bisa cu e resultadonan aki ta un refelho di e bon relacionnan cu Minister Otmar Oduber y e partnernan den e industria manera ta APA y ATA a restablece cu e companianan crucero for di 2009. Tambe ta un refleho di e mehoracionnan cu ya caba tabata den proceso den nos centro di ciudad y cu tabata mehorando e calidad di Producto Aruba.
Minister Oduber a indica cu e inversionnan haci pa Gabinete Mike Eman tabatin diferente meta, un di nan por wordo mira awe cu e resultadonan di BREA cu ta mustra cu e bishitantenan crucero a laga mas placa atras den nos economia , lo cual ta beneficia nos comunidad y ta contribui na e desaroyo economico di nos isla.
Den e di dos mitad di aña ta spera cu e ultimo estudio di BREA keda conoci y tur indicacion ta mustra cu 2015 lo presenta mihor resultadonan ainda cu 2012.
Minister Otmar Oduber ta gradici tur esnan cu a haci e logro aki posibel y ta felicita e actornan aki, pero tambe henter pueblo di Aruba pa e resultadonan positivo cu nos pilar economico a bin ta presentando, no solamente pa loke ta trata turismo crucero, pero tambe turismo en general, cual segun ultimo datonan di Banco Central a presenta un crecemento di 173 miyon na 2014 compara cu 2013.
Johnnyhabibe-Anchorman 