Rene Herde’ “SIGUI EHECUTA E PLAN pa 2013-2017” Ahusta e accionnan unda y ora mester

Posted: April 19, 2015 in Johnny Habibe

Rene 10

Oranjestad-“Ta increibel loke Aruba a logra di haci for di 2010 pa sali for di e crisis mundial y e desaster economico, financiero, social y un infrastructura den decadencia, cu MEP a laga nos pais cun’e. E plan cu gobierno di AVP a presenta y ehecuta, a duna su resultado. E plan cu gobierno di AVP tin awor pa 2014-2017 lo haci mescos. E lo sanea finansa publico den forma structural y logra e metanan di “presupuestonan balansa” a corto plazo y finansa publico sostenibel a largo plazo. E plan ta bon. Segun e fraccion di AVP mester sigui ehecut’e, aunke mester por ahusta accionnan si y ora mester. E plan ta ensera reformanan profundo y structural. Si ehecuta e reformanan gradualmente, e lo sigura cu tur e cambionan lo no afecta e crecemento economico y creasion di cuponan di trabou.” Fraccion di AVP ta sostene e plan aki tambe, pasobra e ta e un plan balansa, cu ta e miho pa tur hende na Aruba. E fraccion ta haya si, cu mester ehecuta e plan sin tarda mas. Tanto pa e bahamento di gasto, e reforma di aparato, como pa aumento di entrada, mester actua mas lihe.

Rene Herde, lider di e fraccion di AVP ta subraya cu loke Aruba a logra cu e maneho di 2010 pa 2013 tabata fenomenal. Ta poco pais a logra sali for di e crisis mas fuerte. Aruba ta uno di nan. Economia di Aruba a crece di -15% pa +3% crecemento den apenas tres aña. E plan a revitalisa economia y a baha desempleo di 11% pa rond di 7% den apenas cuatro aña. A elimina e riesgonan grandi pa e fondonan social di AOV, e fondo di pensioen di trahador di gobierno y maestro di scol (APFA) y a baha e dependencia di AZV di contribucion financiero di gobierno. Awe no solamente e pensioen y seguro medico di tur hende ta sigura atrobe, pero e fondonan aki no ta forma un riesgo financiero mas pa presupuesto di gobierno. Ta AZV so falta un poco. Tur esaki den apenas cinco aña! Kier men cu e plannan di gobierno di AVP ta duna nan resultado.

AHUSTA MANEHO. NO CAMBIA E PLAN

E meta principal di gobierno awor ta pa percura pa gobierno cubri tur su gastonan cu e entradanan cu e ta haya. Esaki ta exigi pa baha gasto y aumenta entrada di gobierno. Pa logra esaki a fiha un plan di mas aña cu metanan pa yega na dje. Awor aki gobierno ta cumpli hopi bon cu e normanan financiero di e “presupuesto di mas aña” aki. Kier men cu e maneho aki ta dunando bon resultado caba. Pa logra yega e punto di “presupuestonan balansa” na 2017/2018, gobierno a presenta un plan pa gradualmente baha su gastonan y aumenta su entradanan. Esaki ta bon pasobra di e forma aki no ta causa shocknan grandi den comunidad, no ta afecta e forsa di compra y no ta stroba crecemento economico. Na final gobierno di Aruba lo tin un situacion financiero mas sostenibel a largo plazo. Sinembargo e fraccion di AVP ta haya cu gobierno por haci mas pa baha su gastonan y aumenta su entradanan. Pa baha su gastonan mas, e fraccion ta haya cu gobierno mester reorganisa departamentonan mas lihe y elimina tur forma di ineficiencia y gastonan innecesario. Ningun hende kier wak placa wordo gasta na ineficiencia. Pa loke ta e aumento di entrada di gobierno, e fraccion no kier aumenta e BBO. Pero si ta studiando e posibilidad di hisa e entradanan mas. Esaki lo mester sosode den forma indirecto, caminda no ta introduci niun belasting nobo y no ta hisa prima di niun fondo. E entrada extra aki lo mester bin di tur hende na Aruba. Tambe e un miyon turista cu ta bin pasa tempo na Aruba. E cantidad grandi aki, hasta cu un contribucion chikito, lo haci hopi diferencia.

Den su preparacion pa tratamento di presupuesto e fraccion a haci estudio di diferente alternativa pa baha gasto y aumenta entrada, pero semper a pone como condicion cu e mester bay den forma cu no ta stroba economia of creasion di cupo di trabou. Tampoco e tin mag di nifica un aumento di peso den forma drastico pa pueblo.

   ADVERTISE 3

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s