Oranjestad – Riba dia 22 di April, mundo completo ta reconoce y celebra Dia Internacional di Mama Tera cu e anja aki ta hiba e tema “Ban redifini loke progreso ta significa: Ta nos turno pa guia”.
E aña aki Dia Internacional di Tera ta mas special cu nunca ya cu ta celebrando e di 45 anja cu ta reconoce internacionalmente e dia aki. Tambe pa prome biaha UNESCO ta premira cu esaki lo ta e aña unda cu crecimento economico ta uni man den man cu sustenibilidad, unda cu lidernan mundial finalmente lo tuma na serio e cambionan climatico cu tur e consequencianan cu esaki ta trese cune y pa e mitibo aki inverti den solucionnan di energia reusable.
Riba Dia Internacional di Tera nos mester uni hunto y mustra mundo completo riba un direccion nobo. Ta nos turno pa guia pa asina e lidernan mundial por sigui nos ehempel.
En conexion cu Dia International di Tera, Santa Rosa kier comparti algun conseho con bo tambe por uni na y sirbi como guia pa cu proteccion y cuido di nos tera.
Ban warde. Ban dreche. Ban crece!
Boter di plastic y glas ta traha perfectamente como potchi pa planta simiya
Carton di webo tambe ta perfecto pa planta simiya y cuida esakinan te ora cu e mata mester wordo transplanta den un potchi mas grandi
Paletnan di palo tambe por wordo warda y usa pa “vertical planting” cual ta un sistema di planta cu ta rekeri poko espacio.
Obhetonan decorativo manera stoel, mesa, tirenan di auto tur por wordo usa como decoracion den cura y alaves wordo usa pa planta mata.
Fruta y berduranan tambe por wordo warda, drecha y crece. Un manera facil pa haci esaki ta dor di warda e simiyanan di e fruta cu bo a consumi y planta esakinan. Patia, tomati, promenton y hasta awakati ta sumamente facil pa planta na cas. Y Santa Rosa tin personalnan atento kende cu amor y dedicacion lo brinda conseho y guia con pa planta na cas.
Departamento di Agricultura, Cria y Pesca kier extende palabranan di elogio na nos Agricultor y Criadornan local kende semper ta percura pa bin cu ideanan creativo pa haci uso di recyclahe y incorpora esakinan den nan Cunuku.
Durante e ultimo temponan aki Santa Rosa a bin ta tuma nota via medionan social di mas y mas persona ambos grandi como chikito kende ta birando mas conciente riba e efecto cu nan forma di biba tin riba nos Mama Tera y ta adapta y tuma responsabilidad pa nan actonan specialmente ora ta trata di recyclahe y plantamento na cas pa asina biba un biba mas sustenibel.
Santa Rosa tambe ta uni na e dia special aki y lo ta celebrando Dia Internacional di Mama Tera hunto cu Biblioteca Nacional riba dia 22 di April for di 9or di mainta te cu 3or di merdia na Arubiana (Bachstraat 5, patras di Juliana School) unda cu lo tin differente tentnan cu remedinan di Tera, cosnan dushi, pasaboca vegetariano y demostracion y charlanan sumamente interesante. Riba e dia aki sra. Judith Boekhoudt hunto cu sra. Olinda Rasmijn lo ta presente cu un charla riba differente matanan local cu wordo wordo usa como remedi di tera y nan beneficionan.
Riba dia 26 di April Santa Rosa lo continua cu su celebracion cu un Grandioso Mercado di Santa Rosa cuminsando for di 9or di mainta te cu 3or di merdia den ambiente y cu productonan local manera solamente Santa Rosa sa di presenta.
Santa Rosa cordialmente ta invita pueblo completo pa bin celebra Dia di Tera riba dia 22 di April na Arubiana y como tambe riba dia 26 di April na Santa Rosa cu entrada completamente gratis.
“BAN SOSTENE NOS CULTURA , PRACTICA CRIA, PESCA Y AGRICULTURA
Johnnyhabibe-Anchorman 