Rene Herde’ DOS CAMINDA Uno ta di reforma gradual a base di dialogo y contribucion di tur cu ta hiba na bienestar pa tur. E otro ta di medida pisa y cada ken ta bringa pa su mes, cu ta hiba na confrontacion, division y deterioro.

Posted: April 20, 2015 in Noticiero 94

Rene10

Oranjestad-“Si bo wak unda nos tabata na 2009, unda nos ta awe y unda nos kier yega, bo ta conclui cu e forma cu nos a traha hunto den ultimo cinco aña ta esun corecto. Ta poco pais na mundo a sobrevivi loke Aruba a pasa aden. Poco economia a cay cu 15% y dos biaha den tres aña., pa despues crece atrobe. Ta poco pais a logra pone asina hopi hende bek na trabou den asina poco tempo. Ta poco pais a logra salba e pensioen di tur nan pensionadonan y sigura esaki pa futuro, sin corta den e pensioen. Ta poco pais a logra tene e forsa di compra di esnan cu entrada mas abou, manera nos a haci. Ta poco pais a sigura inversionistanan un bon ganashi atrobe. Ta poco pais a logra inverti y cambia nan infrastructura asina hopi den asina poco tempo y duna miho oportunidad economico pa futuro. Nos a logra esaki hunto. Den dialogo continuo. Ta asina a logra cambia den forma structural hopi cos na beneficio di henter pueblo. No pa niun grupo chikito so. E meta di cuida otro y bay dilanti hunto a guia nos den esey. Wak di unda nos a bin y wak unda nos ta awe.” Asina Rene Herde, lider di e fraccion di AVP a declara den preparacion pa tratamento di presupuesto cu no ta trata di cifranan so. Pero tambe di e vision di unda kier hiba nos pais y con pa yega eynan.

E CAMINDA PADILANTI

E caminda cu nos a cana di 2009 te awe ta uno den union, cu metanan fiho nos dilanti pa sali di e crisis sin laga niun hende atras. Ta asina a logra tene e forsa di compra pa tur hende. Ta asina a logra revitalisa economia y crea cuponan di trabou nobo. Awor e reto nos dilanti ta pa sanea finansa di gobierno y sigura cu pa semper den futuro cu gobierno ta un estimulo pa nos pais y no un peso cu ta stroba, manera e tabata den pasado. Tur loke ta sosode awor aki den gobierno y den nos pais, tur e cambionan, tur tin un meta: sanea den forma structural economia y gobierno, tur su servicionan y tur su costonan, di tal forma cu e ta keda sano y un instrumento pa adelanto di henter nos pais. E caminda pa yega eynan ta atrobe di traha hunto, dialoga enbez di confronta, di duna y comparti enbez di exigi. E ta di pone metanan comun nos dilanti y traha hunto pa logra nan. Pasobra na final ta nos tur ta beneficia di nan. E caminda contrario ta di cada uno bay para riba su ‘strepi’, exigi loke ta bon pa bo so, exigi y nenga di contribui enbez di comparti peso di e cambionan. E ta lubida e metanan comun cu ta na interes di nos tur y cada uno bringa pa su mes. E perdedor semper lo ta e pais cu nos tur ta biba aden y ta responsabel pe. Rene Herde’: “Ta na cada uno di nos pa scohe cua caminda nos kier. E caminda di traha pa bienestar di nos pais y di nos tur, of esun cu cada uno ta briga pa su mes sin tene cuenta cu otro. Si nos a bringa otro enbez di sinta y dialoga cu otro, nos lo ta para mes malo of pio cu unda nos tabata na 2009. Si cada uno di nos bringa pa su mes sin tene cuenta cu otro of cu loke ta bon pa nos tur y duna di nos parti pa logra esaki, keremi, nos ta cay bek na e nivel di 2009. Tur loke nos a logra y tur e trabou duro lo ta envano. Esnan cu mas lo sufri ta esnan di menos recurso y cu menos oportunidad. Alcontrario, si nos sigui dialoga te yega na otro, nos lo sigui fortifica nos pais y sigura nos tur un miho bida aki na Aruba.” Asina Rene Herde’ a bisa papiando di e forma pa nos bay dilanti na Aruba. Durante di tratamento di presupuesto y di e maneho di nos pais, lo puntra cada partido pa scohe e caminda cu nan ta cana pa hiba nos pais dilanti. Pa e fraccion di AVP e caminda ta esun cu a saca nos di e abismo y pone nos riba e caminda cu nos ta awe. E caminda cu falta ta yen di buraco y piedra, pero hunto nos por logr’e segun e fraccion berde.

94 Class

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s