Esakí tabata un pregunta ku nos mester a hasi depues ku nos a skucha i mira “Ritmo Banana”, e video clip di e produkshon nobo di Edsel ‘Payo’ Juliet.
Payo Juliet a yega Kòrsou e siman akí pa un gira kòrtiku ku La Banda Loca, su banda úniko i loko-loko.
E lo tin algun presentashon i esun di mas antisipá ta djaluna dia 27 di aprel, Dia di Rei o sea Koningsdag den Pietermaai Smal.
Despues di su “E Botón ta ploí” ku a bira un tremendo hit via You tube, ni maske ku algun radio na Kòrsou a ninga di tok’é, Edsel “Payo” Juliet a disidí pa trese algu otro atrobe pa su fanátiko. Ora nos a mira e video clip nos no por a laga di puntra Payo Juliet ta kiko a pas’é. Si ta kombertí el a kombertí?
Mester bisa ku e produkshon akí ta basta kòrtiku i ta kaba masha lihé. P’esei e ta laga bo keda ku smak pa skuch’é atrobe. Skuchando e produkshon akí nos tabata mashá pendiente p’e asuntu di dòbel sintí …., pero nada! Bou di harimentu Edsel “Payo” Juliet a kontestá nos: “Kòrda bon ta na Papiamentu m’a kanta semper bai. Papiamentu ta nos dushi idioma ku por laga nos hari i yora ku palabra ku ta duna kada ken e derecho pa entrepetá e lokual ku nán kier entrepetá.” E biaha akí Payo Juliet ta kanta banana, e fruta delisioso i salú ku nos pueblo ta kome sagradamente su só òf na banda di kasi tur kuminda. Payo ta splika nos ku e ta un kantika ku a nase durante un fiesta na kas di Juana. Un “grapje” ku a bira un éksito total na e fiesta ei. Esei a pone ku Payo huntu ku Albert Windster (sound producer) a disidí di bisti’é un bachi nobo. Pa koroná e obra akí, Juliet a traha un video clip estilo di karikatura.
Manteka studio’s a tuma e enkargo kompleto riba dje pa traha e video clip di Ritmo Banana i ta splika ku no ta fásil pa den un tempu kòrtiku traha un pelíkula estilo karikatura, pero e resultado a bira algu úniko a la Payo.
Awe nos a risibí e video clip. Nos a wak e i nos a gos’é un mundu. Pasombra esakí ta algu otro, úniko i inovativo pa Kòrsou. Edsel “Payo” Juliet lo sòru pa tur miembro di su fanclub ku smartphone risibi e kantika akí riba smartphone. Esnan ku tin smartphone i ku no ta miembro ainda, por sms via (+5999)514.7257 i risibí e kantika grátis riba nan telefòn. Kòrsou ta ansioso pa baila “Ritmo Banana”, ke men “Payo” Juliet yega, yega pa kaba!
Johnnyhabibe-Anchorman 