Oranjestad-Den cuadro di celebracion di Dia Internacional di Tera, Minister Otmar Oduber ta aplaudi e tema escohi e aña aki unda ta honra loke ta e progreso di nos suelonan.
E aña aki UNESCO ta celebrando e di 45 aña cu ta reconoce internacionalmente e dia aki. Pa Minister Oduber ta di suma importancia saliendo for di su maneho pa haci menos uso di kimico pa yuda conserva e salud di nos suelonan.
Ta hopi importante pa aki na Aruba nos educa y guia comunidad y agricultornan riba e importancia pa mantene nos suelonan organico y liber di cosnan dañino cu a largo plazo lo perhudica nos cosecha y cu lo tin un efecto a largo plazo riba esnan cu ta consumi esaki.
Ya caba Aruba ta un di e islanan den region cu por medio di Santa Rosa ta percura cu e proteccion y cuido di nos tera ta na prome lugar.
Pa Ministerio di Sector Primario ta hopi importante pa den cuadro di educacion di nos comunidad percura pa enfoca riba loke ta e concientisacion pa nos ta mas sostenibel pa asina aki conserva nos tera.
Esaki ta un di e tareanan di Santa Rosa, pa asina motiva e plantamento na cas.
Minister Oduber kier invita comunidad completo pa continua e celebracion aki dia 26 di april hunto cu Santa Rosa durante e Mercado di Santa Rosa cuminsando for di 9or di mainta te cu 3or di merdia den ambiente y cu productonan local.
Johnnyhabibe-Anchorman 