Siman pasa nos a tuma nota cu Asociacion di bankeronan di Aruba a tene un conferencia di prensa pa duna informacion relaciona cu e ley di paga belasting riba cambio di moneda stranhero (koersmargevergoeding). Den esaki nan a trece padilanti na pueblo cu niun banco lo no por bai carga cu e gastonan e impuesto riba e tipo di transaccionan aki!
Remarcabel di esaki ta e hecho cu nunca e pueblo consumidor lo mester a bai confronta su mes cu e medida aki. Minister di Finansas a garantisa den e reunion cu a trata e ley aki cu no lo pasa e gastonan pa e pueblo. Fraccion di MEP a hasta traha un mocion cu a wordo acepta unanime pero a resulta cu tawatin ignorancia total di parti minister.
En conexion cu esaki fraccion MEP a manda pidi un reunion publico invitando Minister Bermudez pe bin splica dicon pueblo ta esun saliendo perhudica atrobe cu e ley aki. Nos fraccion ta spera cu e reunion aki por wordo jama pronto pa nos haya mas claridad riba e situacion. Si resulta cu e no lo hasi nada Fraccion di MEP mes lo trece un amienda den ley pa pueblo no wordo castiga mas.
Johnnyhabibe-Anchorman 