Johnnyhabibe-Anchorman

Oranjestad-Manera ya ta conoci Harley-Davidson a adopta luna di mei como e “Women Riders Month” pa dje forma aki duna reconocimento na tur hende muhe cu tabatin y tin e curashi di tuma “life by the handlebars of a Harley-Davidson”.

E mundo di Harley-Davidson pa hopi decada tabata consisti predominantemente di biker masculino. Manera e añanan a transcuri mas y mas hende muhe a tuma e curashi di cumpra su propio Harley-Davidson y awendia nan ta ‘respected riders’ di Harley-Davidson rond mundo completo.

Pa duna “Women Riders Month” mas contenido, Harley-Davidson na 2009 a dicidi di organisa e prome Ladies of Harley Ride, mescos cu akin a Aruba. Pues e aña aki nos ta celebrando nos di 6 aña di Ladies of Harley Ride.

E aña aki nos kier dedica nos Ladies of Harley Ride na cada un hende muhe cu a sobrebibi e malesa di cancer. Pa e motibo aki nos lo haci un donacion na Mary Joan Foundation. For di awo caba nos kier anuncia cu e diabierna dia 8 di mei nos lo saca un ride pa bay Mary Joan Foundation y haci entrega di e check como donacion.

Ladies of Harley Ride lo cuminsa diabierna dia prome di mei di 6pm – 10pm na House of Cake na Savaneta cu un tremendo anochi di inscripcion combina cu diferente wega, musica, bar y cushina bon surti. Prijs di inscripcion ta Afl 50 y esaki ta inclui 2 t–shirt, un pin conmemorativo di e di 6 Ladies of Harley Ride, cuminda y bebida pa dia 3 di mei.

Nos ta continua cu nos celebracion di biaha diasabra dia 2 di mei cu nos Night Ride, cu lo cuminsa y termina na House of Cake cu tremendo ambiente.

Y pa finalisa dia 3 di mei ta e 6^th annual Ladies of Harley Ride cu lo sali for di House of Cake cu un recorido rond di Aruba, cu 2 diferente stop. Lo tin bebida pa refresca tur garganta. Aki lo tin algun competencia entre e bikernan cu premionan masha atractivo. E dia aki nos lo termina na nos mesun punto di salida cu un gran evento combina cu musica y bike show. Pues lo bay tin tremendo ambiente y hopi premio y sigur cu nos bar y cushina lo ta bon surti.

Manera e nomber mes ta bisa y pa e prome 4 añanan, e Ladies of Harley Ride tabata exclusivamente pa Lady Bikers. Pero e aña pasa aki HOG Aruba Chapter, a dicidi di rindi tributo na tur e Lady Biker di Aruba. Y e aña aki esaki lo ta e caso atrobe na unda nos tambe lo contribui na e bunita gesto di e damanan cu a logra gana e lucha contra cancer.

Con nos lo haci esaki? Invitando tur cabayero Harleysta tur cabayero Biker pa join nos hende muhenan e aña aki den e Ladies of Harley Ride. Aruba ta bay conoce hopi biker cu kier yuda fundacion di Mary Joan pa nan por sigui yuda pueblo den e bataya aki.

Pues Cabayeronan, ban join HOG Aruba Chapter y duna honor na tur Lady Bikers y tur Lady Cancer Survivor participando activamente fin di siman di prome, 2 y 3 di mei den Aruba y Harley-Davidson su di 6 edishon di “Ladies of Harley Ride”.

Tambe nos kier enfatisa cu apesar cu e ta un ride organisa pa Harley-Davidson y HOG Aruba Chapter, tur tipo y marca di bike ta bonbini pa participa den e haci e evento aki. Si bo tin scooter, quad of trike, no importa e marca, tur cabayero biker ta bonbini pa participa y compaña nos hende muhenan den e tremendo ride aki.

Cu hopi gratitud nos ta menciona nos sponsornan cu ta haci e ride di e aña aki posibel cu ta Harley-Davidson Aruba, House of Cake, Neutrogena, Balashi, Aledda N.V. y MIPA professional coating. Un danki hopi grandi di curazon na nomber di HOG Aruba Chapter.